Rayna sa Kalinaw, sumbanan sa ika-35 nga Kapistahan

Kalinaw ug pagbag-o sa kasing-kasing. Mao kini ang sentro sa kasaulogan sa ika-35 nga kapistahan sa GKK Queen of Peace, Nova Tierra Village, Brgy. V. Hizon, Sasa, nga sakop sa parokya sa St. Joseph the Worker Parish, Sasa. Ang Santos nga Misa nagsugod sa alas sais y media ang takna sa buntag nga gipanguluhan ni Rev. Fr. Evan Esmade, CP.

Sa homiliya ni Fr. Evan gipadayag niya nga ang petsa sa kapistahan sa Rayna sa Kalinaw natunong sa samang adlaw sa Kapistahan sa unang pagpakita sa Mahal nga Birhen sa tulo ka bata sa Fatima. Sumala niya nga ang posibleng rason pareha ang petsa sa kapistahan tungod kay ang sentrong mensahe sa Birhen sa Fatima mao ang pag-ampo, pagdebosyon sa iyang labing putling kasing-kasing ug hilabina ang kalinaw. Kini tungod kay kining mga tuiga mao ang panahon sa dakong gubat ug giyera sa nasud. Mao kini ang panawagan sa Mahal nga Inahan nga padayong mag-ampo alang sa kalinaw sa tanan.

Gipaambit sa Pangulo sa Katilingban nga dili lang pag-ampo sa siyam ka adlaw sa nobena ug pagpahigayon og motorcade sa bisperas ang ilang aktibidades karong tuiga. Dugang pa niini adunay gipahigayong panagtapok sa mga batan-ong magtiayon ug usab usa ka pilgrimage ngadto sa tulo ka mga Marian Parishes. Kining mga parokya mao ang St. Mary of the Perpetual Rosary Parish Buhangin, Our Mother of Perpetual Help Parish Bajada, ug Our Lady of the Assumption Parish sa F.Torres St. Gitapos nila ang ilang panaw-duaw pinaagi sa pagtambong sa Santos nga Misa sa alas dose ang takna sa udto sa Archdiocesan Marian Exhibit sa NCCC Victoria Mall Plaza.

Dako ang pasalamat sa PSK sa suporta sa mga lideres ug mga miyembro sa ilang komunidad nga nahimong rason sa malampusong kasaulogan.

Atong pangayuon nga kita mamahimong instrumento sa kalinaw. Viva Mahal nga Rayna sa Kalinaw! (Allyza Hope Tabigue)