San Isidro Sumbanan sa Pagkamaampoon ug Pagkamanggihatagon sa Tuig sa Hubileyo

Pagkamaampoon ug pagkamanggihatagon. Mao kini ang sentrong mensahe sa ika-32 nga Kapistahan sa GKK San Isidro Labrador Juliville nga sakop sa St. Mary of the Perpetual Rosary Parish Buhangin. Gipahigayon ang Fiesta Mass kaniadtong Mayo 17, 2025 sa alas sais ang takna sa buntag ug gipangulohan kini ni Rev. Fr. Romeo “Romy” Coronel, OSA inubanan sa temang: “Sr. San Isidro Labrador inspirasyon sa kalinaw diha sa Hiniusang Pagpanaw ning tuig sa Hubiliyo sa Paglaum.”

Sa homiliya ni Fr. Romy iyang gipaambit niya ang pagkamilagroso sa maong patron. Gipahayag niya ang kaanindot sa kinaiya ni San Isidro Labrador nga mao ang pagkahinimbahon. Mahinumdomang sa dili pa moadto si San Isidro sa umahan, mosimba usa siya ug sa iyang pagbalik sa uma aduna nay mga anghel nga nagdaro. Tuod man ginasumbong siya sa iyang mga kauban sa trabaho, nagpadayon siya sa iyang pagkamaampoon.

Dugang pa niini gipaambit ni Fr. Romy nga taliwala sa kapobrehon ug kawad-on ni San Isidro, wala siya nagdumili nga pasudlon ug pakaonon ang iyang mga silingan o mga kabus sa ilang panimalay. Ug tuod man matingala ang iyang asawa nga si Maria dela Cabeza tungod kay adunay pagkaon nga ilang mapaambit ngadto sa mga nanginahanglan.

Kining mga panghitabo sa kinabuhi sa patron, nagpadayag sa mga milagro nga gikan sa kaayo sa Ginoo. Dili man susama ang atong mga kasinatian ni San Isidro, apan kung atong puy-an ang iyang mga hiyas sa inadlaw-adlaw natong kinabuhi, kini pagpadayag na sa usa ka milagro.

Nagpadayag usab sa iyang pagpasalamat ang Pangulo sa Katilingban (PSK) nga si Mrs. Emma Bulao ilabina sa mga aktibong GKK Servant Leaders (GSL), servers ug sa manggihatagong mga miyembro sa katilingban nga naghatag sa ilang suporta sa tanang mga kalihokan sa katilingban nga nagresulta sa maanindot ngak konstruksyon sa kapilya. Mapasalamaton usab ang mga GSL sa Labaw’ng Makagagahum ug sa pangama sa patron San Isidro Labrador sa kanunay nga paggiya sa katilingban. Tungod sa grasya sa Ginoo, nagpabiling lig-on ug malambuon ang katilingban sa GKK SIL Juliville.

San Isidro Labrador among sumbanan sa pagkamaampoon ug pagkamanggihatagon, i-ampo mo kami. (Allyza Hope Tabigue)