Bililhong Gasa Sa Katilingbang Nagkahiusa

Sa daplin sa Matina Aplaya, may usa ka katilingban nga sama sa usa ka binhi nga nitubo ug nilambo diha sa yuta nga gibunyagan sa pagtuo ug panaghiusa. Kini ang Gagmay’ng Kristohanong Katilingban (GKK) Nuestra Señora del Carmen, nga karon nagtimaan sa ika-157 ka tuig sa nagpadayon ug walay puas nga pagpangalagad isip kabahin sa Simbahan.

Sumala sa gisugilon ni Mr. Ricardo Rival, ang kasamtangang Pangulo sa Katilingbana wala pa kini matawag og Del Carmen Village, ang dapit gitawag pa nga Santa Fe usa ka lugar diin modunggo ang mga Kastila niadtong karaang panahon. Apan sa tuig 1860s, misidlak ang espiritwal nga panaghiusa sa pagpuyo ni Dorothea Suazo, ang tag-iya sa yuta, nga midala sa debosyon sa Nuestra Señora del Carmen. Ang iyang pamilya maoy nag-unang nagpasiugda sa pista matag Hulyo 16, nga sukad kaniadto hangtod karon, gihandom gihapon sa katawhan.

Niadtong 1935, naugmad ang Matina Aplaya Catholic Organization (MACO), nga misakop sa mga lugar gikan sa Pangi hangtod sa Dumalag. Ang unang kapilya yano lang kahoy ug dahon sa lubi ang gigamit apan puno sa espiritu sa panag-ampo. Sa tuig 1939, unang misa sa kapistahan sa Birhen ang gipahigayon, ug kini nagpadayon hangtod karon nga panahon.

Usa sa mga giingon sa katigulangan nga milagro sa patron mao ang sanina sa Birhen nga gisangputan sa amorsiko murag timaan nga siya anaa gyud uban kanila. Ug diha sa damgo, ang Birhen nagtaho sa pipila ka tawo, lakip na kang Pacita Javier, nga duol na ang langitnong panaw. Ang espiritu sa Birhen nagkalat og humot nga makapahupay sa kasakit, ug sa kapilya, ang mga masakiton nangayo ug kaluwasan nga ilang nadawat.

Karon, ang GKK Nuestra Señora del Carmen usa na ka buhi ug buhug-as nga katilingban. Ilawom sa mga lider sama ni Mr. Ricardo Rival ug Sis. Jeanita Martinez, ang kapilya usa ka sentro sa kalihukan espiritwal uban ang kasaulogan sa pulong matag Sabado ug misa matag ikaduha ug ikaupat nga Domingo sa bulan.

Bisan pa sa mga pagsulay, pandemya, pagkunhod sa kabatan-onang miapil, ug pipila ka opisyales nga mihunong sa serbisyo wala maluya ang GKK. Gikupot nila ang ilang misyon: “ang pagdasig sa tanang kaliwatan sa pagkakabahin sa kaluwasan.”

Ang pangandoy sa GKK Nuestra Señora del Carmen dili dako apan lawom: nga walay batan-ong mawala sa panan-aw sa Ginoo; nga mosamot pa ang pag-apil sa mga miyembro sa kasimbahanan; ug nga ang misa ug mga debosyon magpadayon hangtod sa kataposang adlaw. Kay unsa man ang kapilya nga maanindot kung walay katawhan nga nagasimba?

Gikan sa yano nga pamilya ni Dorothea Suazo hangtod sa dagkong kalihukan karong panahona, ang GKK Nuestra Señora del Carmen nagpabilin nga timaan sa buhi nga pagtuo nga nindot nga inspirasyon ilabina sa kasaulogan sa Basic Eclessial Community (BEC) Sunday. Kini nga sugilanon usa lang ka pahinumdom nga bisan sa yano nga pundasyon, basta ang gisaligan mao ang Ginoo ug ang panaghiusa, anaa ang grasya ug panalangin sa Ginoo sa matag-usa. (Allyza Hope J. Tabigue)