Gahum sa Dios ug dili sa tawo

Ika-14 na Domingo sa Ordinaryong Panahon (July 6, 2025)
Is 66:10-14 / Ps 66:1-3, 4-5, 6-7, 16, 20 / Gal 6:14-18 / Lk 10:1-12, 17-20

Magdayeg kita sa kalipay tungod sa gahum sa Dios ug dili tungod kanato. Siya man ang tinubdan ug hinungdan sa atong mga paningkamot.

Human gipadala ni Jesus ang iyang mga tinun-an, atong nadungog sa Ebanghelyo ang iyang pahimangno nga magsadya sila dili tungod sa ilang napakita nga gahum ko dili tungod kay nahisulat ang ilang mga ngalan sa langit. Mao usab kini unta kanato, nga dili unta kita mobatig kahawod kung kita madaugon, kon kita milabaw sa uban, kon kita mas hawod kaysa uban. Hinonoa, maningkamot lamang kita nga mahisakop sa pundok nga makasulod sa gingharian sa langit pinaagi sa atong pagbuhat sa misyon nga gisangon sa Dios kanato.

Bisan gani si San Pablo, sa ikaduhang pagbasa, wala nagpasigarbo gawas sa krus nga iyang gipas-an. Kini tungod kay alang kaniya mas mailhan unta si Kristo ug dili siya. Unta sama kang San Pablo, maningkamot kita nga ang mga kasakit makadala kanato sa lihok sa kalinaw ug kalooy ngadto sa uban. Dili unta kagubot o kamatay ang atong ipasulabi, kon dili nga pinaagi sa pag-antus diha sa pagdawat sa lahi-lahi nga kinaiya ug dili sayon nga batasan sa uban, atong tagdon ang matag usa isip managsuon.

Mailhan gayod unta ang gahum sa Dios dinhi kanato, sama sa gisulti sa unang pagbasa, kon kita nahinumdom sa pagpanalipod sa Ginoo. Ang kahupayan ug maayong kahimtang ato untang masabtan nga dili kini tungod kanato, kon dili sa Ginoo nga naghatag sa atong gikinahanglan ug sa atong kabuhian.

Tinuod gayod nga wala kitay angay ipasigarbo gawas sa kaayo sa Ginoo kanato. Ihatag ta ka niya ang pagdayeg ug himaya kay kaniya ang gahum dili kanato.