Pentekostes: Pasaylo, Buhi, Kahiusahan

Pentekostes (June 8, 2025)
Acts 2:1-11 / Ps 104:1, 24, 29-30, 31, 34 / 1 Cor 12:3b-7, 12-13 or Rom 8:8-17 / sequence Veni Creator Spiritus / Jn 20:19-23 or Jn 14:15-16, 23b-26

Karong adlawa gisaulog sa tibuok Simbahan ang solemnidad sa Pentekostes. Piyesta karon sa Espiritu Santo, 50 ka adlaw sukad nabanhaw ang atong Ginoo. Unsa bay kalambigitan sa Pentekostes sa atong kinabuhi? Kanus-a ba kita makaingon nga nadawat nato ang gipadala nga Espiritu Santo?

Sa Ebanghelyo, ang gasa sa Espiritu Santo magdalag pasaylo. Kining maong pasaylo maoy tinubdan sa kalinaw. Kung ang kalinaw maangkon sa kahapsay, mahapsay lamang ang atong kinabuhi kung kita nahibalik sa maayong relasyon sa Dios ug sa isigkatawo pinaagi sa pagpangayog pasaylo sa atong mga sala. Mapaubsanon ba kita nga moangkon sa atong sala? Andam ba kita nga mangayog pasaylo? Andam ba usab kita nga mopasaylo?

Sa ikaduhang pagbasa, ang Espiritu Santo maghatag kanato sa matuod nga kinabuhi. Ang tawong nakadawat sa Espiritu Santo buhi sa tinuoray. Dili lang siya buhi tungod kay siya may lawas o tungod kay siya adunay unod nga molihok, kondili nagpuyo siyag subay sa gawasnon nga anak sa Dios. Nagsubay ba ang atong kinabuhi sumala sa mando sa espiritu ug dili sa lawasnon lamang? Nabuhi ba kita nga naghimo sa awhag nga Diosnon o kalibutanon lamang?

Sa unang pagbasa, nagdalag kahiusahan. Bisan naggikan ang lain-laing katawhan sa lain-laing mga nasod ug kaliwat, adunay usa ka pagdayeg sa Dios. Bisan og lain-laing ang sinultihan ug kaliwatan, nahitabo ang kahiusahan sa pag-ila sa kaayo sa Ginoo. Walay pandaot ug pagpamintaha sa ilang panag-uban sa panaw paduol sa Dios. Kita ba naglihok aron mahiuli ug mahiusa ang nagun-ob nga relasyon tungod sa milabay nga panaglahi sa pagpili ug partido? Kita ba mapaubsanon nga milihok alang sa maayong pagtagad aron malikayan ang panagbangi ug bingkil?

Ang gasa sa Espiritu Santo maghimo kanatong katawhan nga nagpuyo sa pasaylo, matuod nga buhi gayod ug anaa sa kahiusahan. Hinaot unta nga atong mapuy-an ang katilingbang nagpasaylo, buhi sa tiunuoray ug naghiusa. Busa atong iampo sa kinasing-kasing ang Salmo: Ginoo, ipadala ang imong Espiritu ug bag-oha ang nawong sa yuta.