Bulahan ang lungsod nga gipili sa Ginoo aron maiya

Ika-19 na Domingo sa Ordinaryong Panahon (August 10, 2025)
Wis 18:6-9 / Ps 33:1, 12, 18-19, 20-22 / Heb 11:1-2, 8-19 or 11:1-2, 8-12 / Lk 12:32-48 or 12:35-40

Kinsa ba ang matuod nga bulahan? Kanus-a ka ba mahimong bulahan?

Sa paghandum sa kamatayon sa mga panganay nga Ehiptohanon, ang unang pagbasa nagpahimangno kanato nga bulahan ang tawong kumbisido sa kaayo sa Ginoo. Kini tungod kay siya nasayod nga ang gisaad sa Dios mahitabo gayod, ang saad sa kaluwasan sa matarong ug ang pagsilot sa dautan. Ikaw, kumbinsdo ka ba nga bisan sa peligro ikaw panalipdan ug luwason sa Ginoo? Kumbinsido ka ba nga ang Dios dapig kanimo sa imong buhat nga maayo?

Ang ikaduhang pagbasa nagsaysay sa pagtoo ni Abraham nga naghatod kaniya sa kabulahanan pinaagi sa pagtahan sa iyang kaugalingon. Nahimo siyang masinugtanon taliwala sa walay kasigurohan ug dili kabisado nga kahimtang. Gitahan niya ang tanan tungod sa dako niyang pagtoo sa pag-uban kaniya sa Ginoo. Dili ang iyang kaugalingon maoy gituman. Gitahan mo ba ang imong kaugalingon sa pagbuhat og maayo taliwala sa walay kasigurohan? Gitahan mo ba ang imong kaugalingon sa pagkamatinud-anon sa isigkaingong ug sa tanan nimong gihimo bisan pa man ikaw namiligro?

Diha sa Ebanghelyo, bulahan ang sulugoon nga adunay buhat ug aksiyon. Ang naglangan ug nagpaabot nga siya pasidunggan walay mapaabot nga kabulahanan gikan sa iyang agalon. Bulahan ang mohimo sa angay bisan walay nagtan-aw o walay nag-apura. Siya mao kadtong dili magpaabot sa hinanali nga sukli o ganti. Ang bulahan molihok tungod kay sayod siya nga kini ang angay ug takos. Ikaw, nagbuhat ka ba sa angay bisan walay nag-apura? Milihok ka ba nga responsable bisan walay pasidungog?

Busa, bulahan ang lungsod nga gipili sa Ginoo aron maiya.