Matinud-anong pagsunod kang Kristo

Ika-23 na Domingo sa Ordinaryong Panahon (September 7, 2025)
Wis 9:13-18 / Ps 90:3-4, 5-6, 12-13, 14, 17 / Phlm 9-10, 12-17 / Lk 14:25-33

Aduna kitay puruhan sa pagpakita sa atong mga “pogi points”. Ug gusto pud nato nga makakita ug makadungog og mga “pogi points”. Kini ang atong gihulat diha sa mga maayo ug positibo nga balita, pananglit sa mga report sa proyekto, o sa mga kalamposan sa mga gipanghimo. O bisan gani sa ato mismo nga hitsura, magpaputi gyud ta ug magpaporma bisag walay kwarta o wala usahay ikabuga aron lang makita nga OK ta.

Apan dili kini mao sa pagsunod kang Kristo. Tataw ug giklaro ni Kristo, una sa tanan, nga ang buot mosunod kaniya kinahanglan mag-antus ug mopas-an sa iyang krus. Kinahanglang molantaw sa iyang kaugalingon nga pagkaandam aron sa paglahutay sa katarong ug paghalad sa kaugalingon, sama sa pagtukod og balay, o kaha sa pag-atubang sa usa ka gyira aron molahutay alang sa kadaugan. Andam ka ba nga moantus alang sa Ginoo?

Ikaduha, nindot ang hagit sa ikaduhang pagbasa nga mangayo gayod kita sa kaalam sa Dios. Kay ang tawhanong pangatarongan makapahisalaag, ang tawhanong namimo pulos panaghap. Kinahanglan nga atong mahuptan ang kaalam nga maoy maghatod kanato sa pagtugkad sa unsay makapahimuot sa Ginoo. Ikaw kinsa ba ang imong gisaligan, ang imo ba lamang nga kasinatian ug kahibalo o ang kaalam nga gasa sa Dios?

Busa huptan unta nato ang pagkamadawaton sama sa hangyo ni San Pablo kang Felimon alang kang Onesimo. Kini atong nadungog sa ikaduhang pagbasa kon giunsa ni San Pablo paghulma ang kaniadto ulipon apan karon uban sa gugma ni Kristo nahimong dungganon. Kita usab unta mahimong madawaton sa bisan kinsa bisan sa mga ubos natong mga igsuon kay mao man kini ang batasan ni Kristo, ang pagluwas bisan sa mga gagmay sa atong katilingban. Andam ka ba nga modawat bisan sa mga ubos sa mga mata sa katilingban?

Aron mahimo kitang matuod nga sumusunod ni Kristo, batonan nato ang pag-antus ug pagpas-an sa atong krus, ang pagpangayo sa kaalam sa Dios aron pagtimbang-timbang sa tanan natong pagbuhaton, ug pagkamadawaton sa mga ubos ug gagmay sa atong katilingban. Anaa niini ang mga hiyas sa matinud-anong pagsunod kang Kristo.