Pakigbatok sa daotan

Ika-20 na Domingo sa Ordinaryong Panahon (August 17, 2025)
Jer 38:4-6, 8-10 / Ps 40:2, 3, 4, 18 / Heb 12:1-4 / Lk 12:49-53

Aduna ka bay kaaway? Kinsa ba ang imong kaaway? Ang matuod nga Kristiyano mao ang giaway sa daotan. Ang matuod nga sumusunod ni Kristo nakigbatok sa daotan. Mao kini ang unod sa atong mga pagbasa karong Dominggoha.

Ang tawong matarong supakon gayod sa mga tawong daotan. Dili sila masabtan ug dili madawat tungod kay buot sa mga daotan nga dili masumpo ang ilang daotang binuhatan. Baliktaron sila ug pasanginlan nga sila dili maayo. Mao kini ang nahitabo kang Jeremias diha sa unang pagbasa. Buot siyang patyon sa mga opisyal, ug bisan gani ang hari mitugot nga siya ihulog sa atabay nga puno sa lapok. Apan maayo na lamang nga naluwas siya pinaagi ni Ebedmelic, usa sa mga langyaw nga nagtrabaho sa palasyo nga mihangyo sa hari nga siya luwason.

Mao man kini ang tuyo sa pag-anhi ni Jesus, matod niya sa Ebanghelyo. Ang kalayo nga modilaab pinaagi sa pagkontra ug pagbatok sa usa’g usa, ang pagkabahin-bahin bisan diha sa pamilya ang iyang gidala, ug dili pakigdait. Kining kalayo simbolo sa paghusga ug pagpili sa maayo bisan pa kung dunay mokontra ug mosupak kanimo. Naghagit kini sa pagpili sa matarong nga binuhatan alang sa kaayohna sa tanan ug ang pagsalikway sa korapsiyon, pagpahimulos, pagpamintaha ug uban pa nga makadaot sa mga gagmay sa atong katilingban. Kini unta maoy atong pilion ug buhaton taliwala sa mga pagsalikway ug pagsaway, inay ang pagpadato ug pagpahayahay alang sa kaugalingon lamang.

Sama kang Jeremias ug sa atong Ginoong Jesukristo, gidasig kita sa ikaduhang pagbasa, sa ilang panig-ingnan isip mga saksi sa maong pagpili ug pagbuhat sa maayo. Giawhag kita sa pagsalikway sa tanan nga dili makababag kanato ug ang sala nga naghawid kanato. Gani, dakong hagit nga sama kanila ug uban pang daghang nagpalibot nga pundok sa mga saksi, sama sa mga santos, makigbatok kita sa daotan hangtod sa kamatayon. Kay kini maghatod kanato sa kalipay sa trono sa matuod nga kaluwasan.

Ang atong kaaway dili tawo. Ang atong kaaway mao ang daotan nga migamit sa matag tawo. Dinasig sa pagpuyo sa katarong pinaagi sa ehemplo sa Ginoo, sa mga propeta ug mga santos, pakigbatok kanunay sa daotan. Sangpit sa Dios sa pag-ingon sama sa Salmo, “Ginoo, umari ka ug tabangi ako.”