Pilgrims of Hope for the Care of Creation

Andam na ang tanan alang sa paglusad sa Season of Creation karong bulan sa Septembre 2025 sa tema nga “Pilgrims of Hope for the Care of Creation.”

Sa gi-presentar ni Archdiocesan Social Action Center Director Fr. Leonardo Dublan, Jr. sa ulahing panagtigom sa kaparian, iyang gibutyag ang mga kalihukan alang sa usa ka bulan kapin nga kasaulogan alang sa pagpanalipod sa kinaiyahan, dungan nga ilusad ang Season of Creation sa tibuok Arkidayosis sa Dabaw sa adlawng Domingo, Septembre 7, 2025.

Tawgon ang tanang mga Misa nianang adlawa isip Mass for Creation diin paga-ampoon ang Prayer for Care of Creation una ang Misa ug sa tanang mga Misa sa tibuok bulan sa Septembre. Madunggan usab matag oras ang maong panalangin sa DXGN 89.9 Spirit FM sa Septembre 7 ug sa pagtak-op sa Season of Creation sa Oktubre 5, 2025.

Gilauman nga ang 42 ka mga Parokya sa unang adlaw sa kasaulogan (Sept. 7, 2025) mag-apod-apod ug mga seedlings ug dasigon nga magtanom ug mag-amuma bisag usa ka binhi alang sa indibidwal nga pag-amuma; ug ingon man sa paghimo ug pagpanlimpyo kon clean up drive nga kalihukan.

Sa tibuok bulan usab sa Septembre, pakusgan ang pagkolekta sa single used plastic gikan sa singko mil kilos sa milabay nga tuig, ngadto sa diyes mil kilos sa 42 ka mga Parokya kon 238 kilos matag Parokya.

Ipadayon usab ang mga naandan nga mga kalihukan sama sa Mangrove planting sa Barangay Tambo, IGACOS, Coastal clean-up sa San Juan Agdao, ug Bakhawan Project nga gipahigayon sa simbahan, barangay, mga tulunghan ug sibiko nga mga grupo sa Barangay Aplaya, Bakhawan Project.

Ning tuiga, sugdan sa Septembre 13, adlawng Sabado ang Tree Planting and Caring sa Bukid sa Diosnong Kalooy sa Puting Bato, Penaplata, IGACOS nga pagasalmotan sa tanang mga Parish Social Action Ministry, Pangulo sa Alagad, Parish Disaster and Rescue Team nga mga coordinator pinaagi sa usa ka Pilgrim Walk, Tree Planting and Caring, Santos nga Misa ug fellowship.

Gawas sa mga on-ground nga mga kalihukan, pagaubanan usab kini ug mga programa sa DXGN 89.9 Spirit FM nga maghisgot kabahin sa kinaiyahan, ug sa programang Kristohanong Kalambuan alang sa Kalinaw matag Sabado, alas 7 sa buntag.

Gitakda sa Oktubre 5, 2025, adlawng Domingo ang LOCAL EARTH HOUR pinaagi sa DXGN 89.9 Spirit FM, ang countdown una pa ang alas-7 ang takna sa gabii sulod sa usa ka oras nga dungan palongon ang mga elektrisidad gawas sa mga ospital ug uban pang mga institusyon sa emerhensiya.

Sa maong adlaw, isip pagtak-op sa Season of Creation, ug kasaulogan sa Indigenous Peoples Sunday, adunay pagahimoon nga pagbendita sa mga kahayupan ug mga katanoman – ilabi na sa mga tanom nga seedlings o mga binhi nga gi-pang-apod-apod niadtong pag-abli sa Septembre 7 nga kalihukan sa tanang mga Parokya.