“Ang DIOS mao gayud akong hinabang”

“Ang DIOS mao gayud akong hinabang”, mao kini ang pag-ampo sa katawhan sa San Pedro Calungsod Parish sa pagpahigayon sa Aurora Procession sa alas-singko sa kadlawon niadtong September 6, 2025. Mao kini ang unang Aurora Procession nga gihimo sa San Pedro Calungsod Parish Baguio isip pahinungod kang Santa Maria nga Inahan ni Jesukristo ug pagahimuon ang pagrosaryo matag unang Sabado sa bulan. Sayo sa kabuntagon nagsugod ang Aurora Procession ug gisulayan ang among pagtuo tungod kay sayo pud ang ulan apan wala kini nakababag sa pagpadayag sa among dakong pagtuo sa grasya sa Ginoo.

Gidungog ang among pag-ampo nga moundang ang ulan aron makapadayon sa pagrosaryo, gihatagan kami og grasya sa Dios. Malipayon nga nitambong ang daghang hut-ong sa katawhan nga sumusunod ni Jesukristo uban sa pangama ni Santa Maria uban sa giya sa among kura paroko, Rev. Fr. Marvin M. Del Campo. Nagsugod ang procession sa San Pedro Calungsod Parish palibot sa Baguio Proper. Ang katawhan adunay dakong pagtuo ug paglaum nga pinaagi ni Santa Maria dunggon sa Ginoo ang among mga pangamuyo ug pag-ampo.

Gisundan kini sa Novena alang kay San Pedro Calungsod nga gipangulohan sa mga kabantan-onan sa parokya ug gisaulog usab ang Santos nga Misa sa pagpangulo ni Father Marvin. Sama sa hiyas ni San Pedro Calungsod nga usa ka misyonerong katekistang Katoliko, ang patron ug modelo sa mga kabantan-unon, magtutudlo, ug sumusunod sa Ginoo ang katawhan sa San Pedro Calungsod Parish nagpadayag sa ilang pagtuo sa Dios pinaagi sa pagtambong sa Aurora Procession, Novena ug Santos nga Misa. Ang Novena Alang kay San Pedro Calungsod ginahimo matag adlawng Sabado. Gitambongan kini sa mga katawhan sa tibuok parokya, mga lideres, ug mga miyembro niini. Dako ang pagsalig sa katawhan nga matabangan kami nga mapaduol sa Ginoo pinaagi sa pagtulun-an sa kinabuhi ni San Pedro Calungsod, gitudluan niya ang ang mga bata ug hamtong sa pagtuo sa Ginoo maskin adunay pagsulay sa kinabuhi. Matud pa sa mga katawhan, nalipay sila kay tungod nakamata sila og sayo aron makatambong sa Aurora Procession, Novena ug Santos nga Misa.

Matod pa ni Maebreth M. Mabida, usa ka lider sa kabantan-unan, nga tabangan siya og ampo ni Santa Maria ug San Pedro Calungsod nga hatagan siya sa Ginoo og kahibalo ug kaalam sa panahon sa iyang tulo ka adlaw nga board examination ug naglaum siya nga mahimong malampuson kini. Usa pud ka katekista nga si Teofila Z. Mamites, naghangyo siya kay San Pedro Calungsod nga ipaabot ang iyang pag-ampo sa Ginoo nga adunay kaayuhan ang sakit sa iyang anak ug madala pud niya sa simbahan ang usa pa niya ka anak. Dugang sab niya nga makapaambit siya sa iyang pagkamagsasangyaw sa mga kabataan sa simbahan ug eskwelahan. Nalipay usab si ma’am Cristita A. Lopez, usa ka retiradong magtutudlo, nga nakatambong siya sa Procession, Novena ug Santos nga Misa kay nakita niya ang mga kabantan-unan nga nagserbisyo sa simbahan ug gihimong modelo ang atong patron sa pagpangalagad ug pagsakripisyo sa kinabuhi aron matuman ang misyon. Nag-ampo siya sa Ginoo pinaagi sa paggiya ni San Pedro Calungsod nga matabangan ang mga kabantan-unan.

Gipaambit ni Father Marvin sa iyang homiliya nga kita magkanunayon sa pagpaabot nga dunggon ang atong pangamuyo pinaagi kay Santa Maria ug San Pedro Calungsod ug hatagan kita sa Ginoo sa grasya kon kita magpadayon sab sa pag-ampo ug pagsakripisyo. Atong hinumduman nga adunay Dios nga atong maduolan sa panahon nga kita mangayo og hinabang. I-Herald. (Lorelyn May L. Cañamo | Photos: Nelvin P. Napagao & Lorelyn May L. Cañamo)