Hinumdomi ang kaayo sa Ginoo

Kapistahan sa Kahimayaan sa Krus (September 14, 2025)
Nm 21:4-9 / Ps 78:1-2, 34-35, 36-37, 38 / Phil 2:6-11 / Jn 3:13-17

Sa dalan usahay daghan ang mawad-an sa pasensya ug mamalikas ug makakita gani og away tungod sa traffic. Sa trabaho ug kasilinganan usahay magkabingkil tungod sa walay pagpaubos. Sa katilingban ug sosyodad daghan pagpangurakot ug pagpanguha sa dili ilaha.

Karong Domingoha, sa unang pagbasa sa Numeros gipahimangnoan kita sa pagpasensya. Kung ang mga Israelita nagbagulbol sa ilang kalisod bisan sa pabor sa Dios kanila, mao usab unta kita nga magpasalamat ug mosalig sa kaayo sa Ginoo sa tumang pagpasensya. Hinaot nga bugnaw ang atong huna-huna ug pagkamapasalamaton sa pagluwas sa Ginoo.

Sa ikaduhang pagbasa, hilabihan ang pagpaubos ni Kristo nga wala Siya maghuna-huna isip Dios kon dili isip ubos nga ulipon. Siya mitahan sa Iyangg kaugalingon bisan sa atong pagkamakasasala. Kita usab unta mahinumdom sa dakung pagpaubos nga mga sulugoon lamang kita sa Dios. Mahimo unta kitang mapaubsanon sa tanan natong buhat ug sa atong relasyon sa uban, kay ang tanan gikan man sa Ginoo bisan ang atong kapadidad ug kalampusan.

Ug sa Ebanghelyo, gihatag sa Amahan kanato ang Iyang Anak aron pagpadayag sa Iyang gugmang walay sukod. Wala Siyay makuha kanato kon dili Siya pa ang mihatag sa tanan kay Siya gugma man. Hinaot nga inay kita maghuna-huna unsay makuha nato sa uban, unta maningkamot kita nga makahatag kay kita gihatagan man sa Dios. Dili unta kahakog ug makasarili ang magpasulabi kay naa sa pagpanghatag ug dili sa pagkuha maoy tuburan sa matuod nga kamaya sa kasing-kasing.

Busa, magpasensya kita, magpaubos ug magmanggihatagon. Hinumduman nato ang kaayo sa Ginoo.