KUMPIRMASYON: Pagdawat ug Pagpuyo sa mga Gasa sa Espiritu Santo

Ang Sakramento sa Kumpirma mao ang ikaduha nga sakramento nga angay dawaton isip mga anak ug sumusunod sa Dios. Tungod sa maong sakramento mas mapalawom ug mapalig-on pa gayod ang atong relasyon ngadto sa Dios isip iyang disipulo.

Niadtong Septembre 20, 2025, malipayong nakadawat ang 217 ka mga kandidato o indibidwal sa St. Mary of the Perpetual Rosary Parish, Buhangin sa Sakramento sa Kumpirma. Usa ka hapsay nga seremonyas nga gipangulohan ni Most Rev. Romulo G. Valles, D.D., Arsobispo sa Davao. Nagsugod kini sa alas dos ang takna sa hapon pinaagi sa Liturhiya sa Pulong ug Rito sa Kumpirma. Natapos kining maong kalihukan sa alas tres y medya sa hapon nga gipahigayon sa Our Lady of the Most Holy Rosary Shrine, Buhangin, Davao City. Kini kabahin sa kasaulogan sa ika-39 nga kapistahan sa St. Mary of the Perpetual Rosary Parish, Buhangin.

Sa homiliya sa Arsobispo, gisaysay niya nga ang Espiritu sa Dios maoy gihatag kanato, ang atong ginhawa sa Espiritu Santo iya sa Ginoo ug ang ginhawa sa kinabuhi ni Kristo. Dugang pa niana, ang ginhawa sa Espiritu ihatag ngadto sa bunyagan.

Malipayon ang mga ministriya sa Pangulo sa Pagpanudlo (PSP) nga nagmalampuson ug hapsay ang rito sa kumpirma. Nagpasalamat ang Pangulo sa Pagpanudlo Parish Coordinator nga si Sis. Dionisia Devera nga ang mga kabataan, mga ginikanan, mga ninong o ninang sa ilang pagsuporta ug tabang ilabina sa gipahigayon nga kumpirmasyon.

Dalaygon ang Dios!

(By Ralph Louie Flores Young, GKK SoCCom)