“Malinawon ug Malaumong Pagbarog ngadto sa Nasudnong Kalambuan”

Usa sa dakong suliran nga giatubang sa nasud mao ang korapsyon sa Pilipinas ilabina sa pag-abuso sa gahum sa mga opisyal sa gobyerno, mga alagad sa publiko, o pribadong indibidwal alang sa personal nga kaayohan sa gasto sa interes sa publiko. Usa kini ka lab-as nga isyu nga nakaapekto sa pagdumala, pagsalig sa publiko, kalamboan sa ekonomiya, ug paghatag og batakang serbisyo sa nasod.

Ang CBCP (Catholic Bishop’s Conference of the Philippines) nagpagawas og sulat nga naghangyo sa katawhan sa pag-apil sa usa ka malinawon nga panagpundok nga gitawag og “Trillion Peso March” (Adlaw sa pag-ampo ug pagpanubag). Ug kini nahitabo kaniadtong Septembre 21 sa may alas dos sa kahapunon.

“Kining panagtigom dili mahitungod sa usa ka politikanhong pasundayag, kondili usa ka moral nga baruganan” nga naga-awhag alang kanatong magtotoong Katoliko diha sa pakighiusa sa pag-ampo kabahin sa korapsyon sa atong nasud. Mahitungod niining panagtapok, aduna kitay mga pipila ka mga magtotoo nga nagpahayag usab sa ilaang opinyon kabahin niini.

Nagkanayon ang usa ka PSL nga si Emilio Amores nga “Ang angay daygon is ang tawo nga abtik og number one is Honest to Goodness, kay we are empowered by the Holy Spirit kay kabahin man kita sa Simbahan”.

Nagpaambit usab si Dolly Ocampo Prieto nga usa ka meyembro sa Social Action, nagkanayon “go gyud ko anang imbitasyon sa CBCP kay dili na gyud nato maantos ang kapait, hilabi na sa atong mga opsiyalis sa Gobyerno nga ang ilang kaugalingon lamang ang ilang gihunahuna, kay ang pundo para man gyud unta na sa atoang kaayohan kay gamayng ulan magbaha dayon”.

Si Papa Francisco nagpadayag nga, “Ang korapsyon dili makigkompetensya sa paglaum,” dili lang kini nagpakita isip usa ka hagit sa moralidad kondili isip usa usab ka tawag alang sa kaisog, pagtuo, ug aksyon. Sa usa ka kalibutan—ug ilabina sa usa ka nasod sama sa Pilipinas—diin ang korapsyon dugay nang nag-ugat sa mga sistema sa gobyerno, negosyo, ug bisan sa adlaw-adlaw nga kinabuhi, kining mga pulonga nagdan-ag sama sa kahayag sa kangitngit.

Sa Pilipinas, ang paglaum nagpasabot sa pagtuo nga posibleng maangkon ang maayong pagdumala. Kini nagpasabot sa pagpangayo og pagkamay-tulubagon, pag-edukar sa atong kaugalingon ug sa uban, pagboto nga maalamon, ug pagpadako sa umaabot nga mga lider nga lig-on ang moral nga pundasyon. Kini nagpasabot nga mahimong bahin sa solusyon imbes nga hilom nga motan-aw diha sa daplin.

Ang korapsyon gamhanan, apan dili kini mohangtod. Dili kini ikatandi sa paglaom nga nagpuyo sa mga tawo nga nagtuo sa hustisya, kamatuoran, ug kausaban. Sama sa gipahinumdoman kita ni Papa Francisco, kana nga paglaum magsugod kanato, ug angay lamang nga ipaambit kining maong paglaum sa uban ilabina sa mga kaigsuonang nanginahanglan. (Sem. Mikko Paulo Labiaga ug Sem. John Michael Pentrante)