Sa imong kakabos, puy-i ang katarong

Ika-25 nga Domingo sa Ordinaryong Panahon (September 21, 2025)
Am 8:4-7 / Ps 113:1-2, 4-6, 7-8 / 1 Tm 2:1-8 / Lk 16:1-3 or 16:10-13

Nakasaksi kita sa sosyodad sa paglaglag sa usa’g usa kung maipit na. Nakita nato ang pag-gamitay aron lamang maangkon ang pansariling tuyo ug kasigurohan. Mao nga sa mga pagbasa karon gipahimangnoan kita sa pagpuyo sa katarong taliwala sa atong kakabos.

Ang Ebanghelyo nagsaysay sa pagdayeg dili sa tikasan nga piniyalan, kondili sa iyang inantigo nga pamaagi aron siya makalingkawas sa kalisod. Gihimo siya nga panig-ingnan ug kadasig dili sa pagtikas, kondili sa pagkamaalamon nga mga paagi sa pag-angkon sa kaluwasan sa mapait nga kahimtang. Kung ang mga tawo nga kalibotanon marunong o maantigo, kita usab unta sa atong paningkamot nga maluwas sa kakabot tungod sa sala, sa paningkamot nga masuod sa Ginoo, maantigo unta nga moamigo o migigala sa Dios pinaag sa pagduol kanuay kaniya diha sa mga sakramento ug kahigayonan sa pag-ampo.

Ang unang pagbasa, nagpahimangno kanato nga walay padulngan ang mga tawo nga tikasan, ang mga tawo nga manlupig, ang mga tawo nga mapahimuslanon sa mga ubos ug kabos sa katilingban. Gipinahan kita sa Ginoo sa pagsubay sa hustong dalan ug dili sa pagpangilkil, pagpangurakot, pagpamakak, pagpamintaha ug pag-abuso sa gahom. Dili unta kita moyatak sa katungod sa uban aron lamang arong maangkon ang atong gusto. Huna-hunaon unta nato kanunay ang pagbuhat sa unsay maayo bisan hinay-hinay ug dili hinanali ang tubag. Kay ang bunga nga maangkon sa tikas ug pamintahan walay unod, ug ang bunga sa tininuod ug tinarong nga buhat magdala sa kalinaw ug kagaan sa kaugalingon.

Busa batonan nato ang pagpaubos ug pagsalig diha sa maampuon nga kinaiya, sama sa gisaysay sa ikaduhang pagbasa. Buot sa Dios nga ang tanan maluwas. Mao nga giawhag kita sa pagbuhat minatarong aron ang kalingkwasan nga tunhay atong maangkon. Diha sa kinasing-kasing nga pag-ampo matag-adlaw, sa walay tinago nga tuyo sa pakiglambigit sa uban, sa dili pag-gamitay sa matag usa, ato unta nga madawat ang panalangin nga atong gikinahanglan sa kanunay.

Busa, likayan ta ang pagpanikas. Subayon ta ang hustong dalan. Mosalig nga uban sa kinasing-kasing nga pagkamaampuon. Sa atong kakabos, puy-an ta ang katarong. Dalaygon ang Dios nga nagbayaw sa kabos.