San Agustin: Dangpanan ug Sumbanan sa Pagkamaampoon

Isip kabahin sa pagpangamdam sa kapistahan ni Sr. San Agustin sa Forestal, Cabantian, Davao City diin nahisakop kini sa parokya sa St. Mary of the Perpetual Rosary Parish, Buhangin; gisugdan ang pagnobena niadtong Agosto 21, 2025 sa alas 7:00 sa gabii, diin gisundan dayon kini og input mahitungod sa Spirituality of Stewardship ni Brod Jun Nardo, nga nagahisgot nga kung kita usa ka piniyalan ato kining gahinan og oras sama sa pagtambong sa Santos nga Misa diin atong gikalawat ang lawas ni Kristo ug atong puy-an ang hiyas ni Hesus nga mao ang pagkamapaubsanon.

Sa ikaduhang gabii sa novena gipaambit sa Family and Life Apostolate (FLA) ug Pangulo sa Kristohanong Banay (PSKB) ang mahitungod sa Christian Parenting diin nagahisgot kung unsa kita nga klase nga ginikanan ngadto sa atong mga anak ug ang responsibilidad isip mga ginikanan. Nga kitang mga ginikanan maoy unang magtutudlo sa atong mga anak.

Pagkabiyernes, Agosto 29, 2025 sa alas 3:00 sa hapon gipahigayon ang pagprusisyon sa matag sakop sa GKK San Agustin. Pagbalik niini sa kapilya gisaulog ang katapusang novena nga gipangulohan ni Brod Salcedo Verano.

Adlawn’ng Sabado Agosto 30, 2025, mao na ang kapistahan ni Sr. San Agustin nga adunay tema: “Sr. San Agustin, Dangpanan ug Sumbanan sa Pagkamaampoon ug sa Pag-alagad Alang sa Kalambuan Diha sa Tuig sa Magpapanaw sa Paglaum.”

Si San Agustin natawo didto sa Tagaste, Africa. Siya nagdako sa kinabuhing kalibutanon. Apan sa grasya sa Ginoo ug sa mga pag-ampo sa iyang inahan nga si Santa Monica, siya nakabig sa pagtuo ug nagpabunyag sa edad nga trientay tres kang San Ambrosio nga Obispo sa Hippo. Gitudlo usab siya nga Obispo sa Hippo ug iyang gilantugi ang mini sa pagtuo. Giila usab siya nga Santos sa Simbahan ug Doktor sa Pagtulon-an nga Kristohanon.

Gipangulohan ang Santos nga Misa nagsugod sa alas 9:00 sa buntag ug kini sa Kura Paroko, Rev. Fr. Orlando Angelia. Gitambongan kini sa mga miyembro ug mga kasigbit na GKK sa Sona Uno. Sa pamalandong ni Fr. Orly pagdako ang imong dawaton dako ang responsibilidad kay ang Dios manggihatagon, gitagaan kita niya basi sa atong kapasidad. Dili angay nga ikompara ang kaugalingon sa uban kay may kaniya kaniya kitang talento. Ang Ginoo naghatag kanato og katakus. Sa katapusan sa atong kinabuhi maghatag kita og husay sa Diyos sama sa mga sulogoon. Kung atong gamiton sa maayo ang bahandi nga gi gasa kanato sa pagtabang sa atong isigkatawo ug alang sa kahimayaan sa Dios tinuod na sulogoon kita sama ni Sr. San Agustin.

Nagkanayon si San Agustin “Ang akong kasing-kasing wala nahiluna, hangtod nga kini nahiluna kanimo.” Pag naa ang Diyos sa imohang kasing-kasing malipayon ka ug dali lang ka makahuna-huna og diskarte sa kinabuhi, kung wala ang Diyos sa imohang kasing-kasing maut-ot ka ug dili makahuna-huna og tarong. Hinaut pa unta sama kita ni San Agustin malipayon ug masaligon kita nga ang Diyos kanunay maga-uban sa atong panaw sa kinabuhi.

Pagkahuman sa Santos nga Misa adunay giandam nga salo-salo alang sa tanan. Sa pagtinabangay sa mga GSL’s ug miyembro nahimong malampuson ang pagsaulog sa kapistahan ni Sr. San Agustin.

VIVA SR. SAN AGUSTIN!

(By Annielyn Abe & Jocelyn Vidamo | GKK SoCCom)