Ang Atong Hinabang Anaa Sa Ginoo

Ika-29 nga Domingo sa Ordinaryong Panahon (October 19, 2025)
Ex 17:8-13 / Ps 121:1-2, 3-4, 5-6, 7-8 / 2 Tim 3:14-4:2 / Lk 18:1-8

Nabati mo ba nga gidungog ka sa panahon sa panginahanglan? Mitubag ba ang Dios sa panahon sa imong pagsangpit? Sa tawo nga dunay pagtoo ang tubag dakong “Oo”. Kini tungod ning mosunod:

Una, ang hustisya nga nagtamod sa balaod dili mabali. Bisan pag nahimong kontrobersyal ang ubang magbabalaod karon nga gustong mobali sa balaod, sa Ebanghelyo atong nadungog nga ang Dios nga tinubdan sa hustisya ug nagpakanaog sa Balaod, mamati gayod sa sinngit sa kabos. Ang pagpamati sa husgado sa byuda nga nangayo og tabang diha sa Ebanghelyo wala nagpasabot sa pagbali sa balaod ug paghikaw sa hustisya. Hinunoa, kini maoy pagpadayag nga ang tawong matinud-anong nag-ampo ug nakigsuod sa Dios dapigan gayod sa Ginoo. Kay ang Dios sa katarong dili mamakak sa pagpadayag sa Iyang kaayo ug katarong.

Ikaduha, bisan usahay kapoyan ug maluya kita sa pag-ampo tungod sa nagkalain-laing hinungdan. Ang plano sa Dios sa katarung modaug gayod ug motanyag sa atong mga hangyo. Mao kini ang nahitabo kay Moises sa unang pagbasa sa iyang po pag-ampo nga modaug si Josue sa gubat. Apan kini nahitabo kung ang matag usa a dunay panagghiusa ug suporta. Kung kita moalayon sama Kang Hur ug Aaron aron ang pag-ampo dili lang sa pipila kondili kita unang tanan, nan modaug gyud kita sa gyira batok sa kurapsyon, bakak ug garbo.

Ikatulo, mabati gayod nato ang tubag sa atong pagsangpit sa Dios kung mamati usab kita ug puy-an ang Kasulatan nga maoy maghatag kanato sa kaalam ug kadasig alang sa katarung. Si San Pablo sa ikaduhang pagbasa nagpahimangno kanato sa pag pamati sa pulong sa Dios nga maoy magtudlo kanato sa hiwi natong binuhatan, maghatag kanatog dungog ug maghitsas kanato sa maayong buhat. Pinaagi niini atong gipadayag ang positibong tubag sa Dios sa atong mga pag-ampo uban sa pagsalig Kaniya.

Busa, iyahat nato ang atong mga mata Kaniya kay bantayan kita Niya. Diha sa dugang pag-ampo nga puno sa pagtuo, dili gayod Niya itugot nga kita maluya ug malukapa. Matod pa sa Salmo, ang atong hinabang anaa sa Ginoo nga nagbuhat sa langit ug yuta.