Ang Ginoo mamati sa singgit sa kabos

Ika-30 nga Domingo sa Ordinaryong Panahon (October 26, 2025)
Sir 35:12-14, 16-18 / Ps 34:2-3, 17-18, 19, 23 / 2 Tim 4:6-8, 16-18 / Lk 18:9-14

Nawad-an ka na ba sa paglaum o nagpadayon ka pa nga maampuon? Nabugnaw kaba tungod kay daw walay kausaban ang dagan sa panahon o nakita mo ba ang kamot sa Ginoo nga naglihok taliwala sa lisod nga sitwasyon?

Diha sa Ebangahelyo, gidungog sa Ginoo ang pag-ampo sa mapaubsanon nga pag-ampo. Gitubag sa Dios ang midawat sa iyang pagkulang ug misalig sa iyang panabang. Kini usab unta ang magpasulabi sa matag usa kanato niining panahon sa kaguliyang sa atong nasod. Padayon unta kitang magpaubos nga modawat nga kita nagkulang sa pagpuyo nga matinud-anon. Ato usab nga iampo nga mahigmata ang tanan, ilabina ang mibati nga sila walay sala, aron unta ang pagpaubos mo patigbabaw, ang matuod nga pagduol sa Ginoo mapuy-an.

Bisan gitalikdan si San Pablo diha sa iyang pag-atubang sa hukmanan, diha sa ikaduhang pagbasa, siya nag-ampo gihapon nga dili unta pakasad-on sila nga wala mitabang kaniya. Tungod sa iyang mapaubsanong pagsalig sa Ginoo, siya nahatagan og kusog aron mosangyaw sa mensahe sa Dios alang sa mga Judio. Kita usab unta makakaplag og kusog ug hinabang sa panahon nga kita gibati nga gitalikdan. Dili unta kita moatras sa pagsangyaw nga buhi ang Ginoo karon sa atong kapanahunan ug nga kita iyang gitawag sa pagpuyo isip presensiya sa Ginoo atubangan sa katawhan nga nahikalimot na sa Ginoo.

Sama sa unang pagbasa nga nagkanayon nga ang Ginoo dili bungol apan mamati hinuon sa singgit sa biyuda ug sa mga sinalikway, kita usab unta mosalig nga dunggon sa Dios ang atong mga protesta. Sama nga gisaysay ni Sirach nga ang mag-alagad sa Dios dunggon gayod, padayon unta kita nga makadasig nga ang tanang naghupot sa gahum mahimo untang tinuod nga alagad ug dili tigpahimulos. Mosalig unta kita nga ang hustisya ug kaangayan ihatag gayod sa Ginoo alang kanatong Iyang mga anak nga nagsangpit Kaniya.Ang Ginoo unta maoy molamdag sa mga gitahasan sa paghukom ug pagpangulo aron ilang mahimo ang unsay angay ug dili ang interes lamang sa kasiguroan sa pipila.

Busa, padayon kita nga mag-ampo kay ang Ginoo mamati sa mga nagpaubos, mohatag kanato og kusog aron mahimong Iyang mga saksi, ug motubag pinaagi sa pagpatunhay sa hustisya ug pagsilot sa mga sad-an. Ang Ginoo mamati sa singgit s kabos.