CBCP-ECSC Bag-ong Chairperson; KKB Ilusad

Pormal na nga gitunol ang responsibilidad ngadto sa bag-ong natudlo nga chairman sa CBCP Episcopal Commission on Social Communications, Oktubre 7 atol sa panagtigom sa mga director sa mga estasyon sa radyo ug telebisyon nga sakop sa Catholic Media Network.

Si outgoing chair nga si San Pablo Bishop Antonio Maralit, Jr. mitunol sa baston nga simbolo sa pagpangulo sa CBCP ECSC ngadto kang Caceres Archbishop Rex Andrew Alarcon atol sa CMN General Assembly nga gipahigayon sa Villa Avanzueda sa San Pablo City, Laguna.

Ang termino sa mga napili nga chairpersons sa CBCP Episcopal Commissions, Committees and Offices gikan niadtong Disyembre 1, 2023 hangtod Nobyembre 30, 2025. Si Maralit naglingkod na isip chairperson sa CBCP ECSC sa duha na ka termino kutob karong tuiga.

Sa iyang pamahayag, giangkon ni Bishop Maralit nga ang nag-inusarang pagmahay niya mao nga karon pa lamang siya nagsugod ug pakiglambigit tali sa Catholic Media Network kon CMN.

Iyang gibutyag nga duna na silay mga plano kaniadto apan napugngan lamang kini tungod sa COVID 19 nga pandemiya, “and of course, everybody trying to recover and everybody trying to find their way with whatever they have been with after the pandemic.”

Gipasabot ni Maralit nga luyo niini anaa sa ilang kasingkasing ang kamatuoran nga kabahin gayud sa Epsicopal Commission on Social communications mao ang mga estasyon sa radyo.

“And no matter how we put it, we need to really do our mission together, collaborate with each other and find a way to find a common path in trying to bring that which the church asks from us and our mission demands from us,” siya midugang.

Busa iyang gipasalamatan ang CMN Director, Reb. P. Francis Lucas sa Infanta, Quezon kinsa naningkamot sa pag-establisar sa maayong linkages sa network sa mga Katolikong radyo sa tibuok Pilipinas ubos sa CBCP.

Atol sa unang adlaw sa Plenarya, namulong si Bishop Maralit kabahin sa Social Communications karon ug ang Catholic Communication sa Synodality Era.

Gilantaw usab ang mga Katolikong Radyo nga gagamit sa CMN nga brand lakip niini ang operasyon ug uban pang mga hisgutanan sa pagpadagan sa mga estasyon.

Ang kanhi umbrella group nga Philippine Federation of Catholic Broadcasts kon PFCB, gi-uyonan sa tanang mga sakop nga ilisan ang pagparehistro niini sanglit nahuman na ang termino sa legalidad sa PFCB ngadto sa Securities and Exchange Commission (SEC). Pagatawgon na kini ug KAPISANAN NG MGA KATOLIKONG BRODKASTER (KKB) nga gitakdang ilusad atol sa asembliya.