Katungod

Ika-28 nga Domingo sa Ordinaryong Panahon (October 12, 2025)
2 Kgs 5:14-17 / Ps 98:1, 2-3, 3-4 / 2 Tm 2:8-13 / Lk 17:11-19

Nasayod ka ba sa imong katungod? Unsa bay ikadalit sa imong pag-gamit sa imong katungod? Nakapahimo ba ang imong katungod sa pagkamaayong tawo?

Usahay inay ang katungod maghatod sa kaayo, kini maghatod hinuon sa pagkamapahitas-on. Kung nagpabilin pa nga mapahitas-on si Naaman, tungod kay siya dako man nga tawo ug dako ang ranggo, dili unta siya motuman sa gisugo kaniya ni Eliseo. Kung si Eliseo nagmapahitas-on pa, iya untang singlon og dakong bayad o suhol si Naaman human siya naayo tungod sa iyang mando isip Propeta. Apan si Naaman nagpaubos ug siya naayo. Si Naaman misimba na sa Dios sa Israel, ang matuod nga simbahon. Ug si Eliseo nagpabilin nga mapaubsanon sa walay pagpaningil og bahin bisan pa man pinaagi kaniya ang gahom sa Dios nakapaayo kang Naaman.

Usahay gigamit ang katungod aron lamang sa pagpaharuhay. Kung nagpabiling magpaharuahay si Naaman kay siya inila man nga tawo ug didto na lamang unta siya motuslob sa kaugalingon sa mga suba sa Damasco, dili unta siya mamaayo. Kung si San Pablo nagpaharuhay pa lamang ug wala nag-antus alang sa Ebanghelyo ni Kristo, kung siya wala pa nagpapriso sa mga kasakit alang sa pagsangyaw sa gitudlo ni Kristo, dili unta siya makakabig og daghang mga tawo. Apan sama ni San Pablo, si Naaman nagpaubos ug gibiyaan ang ilang pagka inila ug pagkagamhanan sa mata sa mga tawo, nahimo silang instrumento aron mailhan ang Ginoo.

Kung ang katungod kanunay mohari sa huna-huna sa tawo, maghari usab ang pagkadili mapasalamaton. Mao kini ang nahitabo sa siyam ka mga naayo nga sanlahon. Sa napulo nga giayo ni Jesuskristo, usa lamang ang mibalik aron magpasalamat sa pagkaamgo nga siya giayo sa Ginoo. Siya mihapa ug nagpasalamat sa dakong pabor ug grasya, inay malimot sa grasya nga iyang nadawat. Ang iyang pagpasalamat nakapasuod kaniya sa Dios ug sa tawo. Ang iyang paghinmdom sa makaluwas nga gahom sa Ginoo nagdala kaniya sa matuod nga kalinaw ug kalipay sa kasing-kasing, ug dugang pang grasya alang kaniya.

Hinaot unta nga ang atong nasod nga Pilipinhon, ilabina ang mga nangulo kanato, mogamit sa ilang katungod dili aron mahimong mapahitas-on, dili aron magpahayahay samtang ang mga kabos nag-antos, kondili aron mahimong mapasalamaton. Gamiton unta nila ang katungod sa dugang pang pag-alagad sa matuod nga Dios ug sa isigkatawo. Niining paagiha, madayag ang makaluwas nga buhat sa Dios sa tanang nasod.