Tulo ka selebrasyon, usa ka dakong kasaulogan sa adlaw sa kapistahan

Ika-67 nga Kapistahan, Canonical Establishment isip Quasi Parish ug Instalasyon sa Priest In-charge

Dinuyogan sa maayong panahon adunay tulo ka selebrasyon ang gisaulog sa mga lumulupyo nga binunyagan ug mga GSLs sa Brgy. Eden, Toril, Davao City niadtong Sept. 29, 2025. Una, mao ang ika-67 nga kapistahan ni San Miguel Arkanghel. Ikaduha, ang pormal nga deklarasyon nga mahimong Quasi-Parish ang San Miguel Arkanghel nga gilangkuban sa 13 ka mga GKKs nga kanhi sakop sa parokya sa Virgen delos Remedios, Crossing Bayabas, Toril. Ikatulo, mao ang installation kay Fr. Christopher Ganzon isip Priest In-charge sa Quasi-Parish sa San Miguel Arkanghel.

Daghang mga pari ug mga layko ang niduyog sa maong kasaulogan. Diha sa homiliya ni Arsobispo Romulo Valles, iyang gipahinumdom nga ang tanan nagkatigom sa maong selebrasyon uban sa presensiya sa atong Ginoo nga maoy tinubdan sa kinabuhi ug hingpit nga kalipay. Iya usab nga giingon nga ang mga Anghel nahisulat sa Daan ug Bag-o nga Kasulatan ug sila ang mga tigpanalipod ug mensahero sa Ginoo.

Miingon ang coordinator sa Pangulo sa Batan-on nga si Stephanie Lacea nga kabahin sa ilang pagpangandam sa maong selebrasyon gikan sa Novena, pagpraktis sa mga altar servers, choir ug magbabasa hangtod sa adlaw nga ilang gi-ampo nga mamahimong Quasi-Parish ang San Miguel Eden ug sa kalipay nga ilang gibati sa 3 in 1 nga selebrasyon.

Sa katapusan akong nahinabi usab ang usa sa mga karaan na nga nag-alagad sa San Miguel ug siya na karon ang Pastoral Coordinator nga si Candido Muñez. Matod pa ni Brod Muñez nagsugod lamang ang instraktura sa simbahan sa mga kahoy nga natukod tungod sa bayanihan. Dako kaayo iyang pasalamat kay sa tuig 2002 inubanan sa pag-ampo ug pagtinabangay sa mga membro ug GSLs napanindot ug napadak-an na ang simbahan nga ang pamilya Ayala maoy ni donar sa lote nga gitukuran sukad pa sa lolo ug lola hangtod sa mga ginikanan ni Miguel Ayala nga kinasingkasing gayud nga nagpasalamat sa malampuson ug mabulokon nga selebrasyon diha sa komunidad nga maampuon sa Diyos. (Lilibeth Sancover | VDLR SoCCom)