Walay makulang kanato

Paghandum sa tanang mga magtutuo nga mihalin na (November 2, 2025)
Wisdom 3:1-9 / Psalms 27:1, 4, 7, 8, 9, 13-14 / Romans 6:3-9 / Matthew 25:31-46

Nganong dako man kining isyu sa flood control ug korapsiyon? Nganong angay man kini nga atubangon natong tanan? Kini tungod kay walay usa kanato nga mabuhi nga siya ra. Walay tawo nga dili makaapekto o dili maapektuhan sa atong mga binuhatan, maayo man o dautan. Ang tawong nag-inusara, kulang. Bisan gani ang mga nangamatay wala nahimulag kanato. Sila atong giampo karon.

Gani sa Ebanghelyo, atong nadungog ang angay nga pagpangilabot nato alang sa matag gagmay sa atong katilingban aron sa ilang pagkulang kita makapuno ug mapuno. Kung kita magpakaon sa gigutom o magpainom sa giuhaw o magbisti sa mga hubo tungod ug alang kang Jesus, kini magdala kanato sa pagpuyo sa gingharian sa Dios. Kay si Kristo mismo niingon nga kung kini gibuhat nato alang sa mga gagmay niya nga mga igsuon, gibuhat nato kini kaniya. Sa laktog nga pagkasulti, buot sa Ginoo nga manumbaling kita sa kahimtang sa matag usa tungod kay walay usa kanato nga mabuhi nga mag-inusara. Natukmod ba kita sa pagtabang sa lisod nga kahimtang sa uban o nakatampo ba hinuon kita sa ilang kalisod?

Matod pa sa ikaduhang pagbasa kini nagsukad sa atong pagkahiusa kang Kristo nga maoy nagpuno kanato. Wala kita nahimulag kaniya tungod kay kita mga binunyagan man. Ang atong bunyag mao ang magpasinati kanato nga moduyog sa pag-antus ug kamatayon sa uban, sama nga si Kristo mipuyo uban kanato aron kita iyang maluwas. Ang atong bunyag maoy magdala kanato sa bag-ong kinabuhi, sa pagkawas sa kalisod nga dala sa kangitngit sa sala, sa pagbangon gikan sa pagkapildi tungod sa kinaugalingon nga panglantaw. Nahigmata ba kita nga mobiya sa atong kahakog ug pansariling pag-atiman lamang o kita ang nahimo nga atimanon sa uban?

Busa, sa unang pagbasa gisaysay nga bisan daw mag-antos kita tungod sa atong buhat ug kinaiya nga matarong, ang maong pag-antos lumalabay lamang. Ang maong pag-anto maoy dalan sa matuod nga kapuno. Bisan daw kabuang ang atong pagpuyo sa mga mata sa dautan kung magbuhat kita sa matarong, kini maoy maghatod kanato sa matuod nga kalinaw ug kalingkawasan. Ang mga pagsulay nga masinati sa matarong dili makapalukapa kaniya kay ang grasya sa Dios anaa kaniya. Milahutay ka ba panahon sa kalisod ug pagsulay aron maangkon mo ang matuod nga kalinaw ug kalingkawasan o nagpahimulos ka ba hinuon sa peki ug lumalabay nga kaharuhay nga magdala kanimo sa pag-antos nga walay kataposan?

Busa mga igsuon, sa atong paghalad og mga pag-ampo sa mga nangamatay, tuy-ora ang imong mga kamot kang Kristo diha sa mga nanginahanglan. Puy-i ang imong bunyag pinaagi sa pagbuhat nga mahinlo ug dili ang pagpamintaha. Lahutay sa pagkamatarong bisan sa mga pag-antos uban sa kasayoran nga kini magdala kanimo sa ganti sa kaluwasan. Ang Dios maoy atong magbalantay, walay makulang kanato.