Mahinlo Unta Ang Balaang Templo Sa Dios

Pista sa pagpahinungod sa lateran basilica (November 9, 2025)
Ez 47:1-2, 8-9, 12 / Ps 46:2-3, 5-6, 8-9 / 1 Cor 3:9-11, 16-17 / Jn 2:13-22

Nikooperar ka ba sa tawag sa Simbahan sa paghinulsol? Nitubag ka ba sa pagdapit sa pagbag-o ug pagbasol? Nisanong ka ba sa kahigayonan sa paghinlo sa kaugalingon ug sa katilingban niining atong panahon karon?

Sa Ebanghelyo, gihinloan ni Jesus ang Templo nga gihimo nga merkado sa mga tawo, matod pa ni Jesus. Imbes kini lugar sa pag-ampo ug pag-inigsuonay, nahimo hinuon nga lugar sa pagpangawkaw sa mga kabus tungod sa ilang mga negosyo. Padayon kita sa atong panahon karon, ilabina sa nasod Pilipinhon, sa pag-ampo sa kahinlo usab sa tagsa-tagsa. Padayon kita maghinulsol aron maulaw kita sa hitabo nga nahimong gihuthotan ang matag usa tungod sa kahakog ug pansarili nga ginansiya.

Sa ikaduhang pagbasa, kining maong templo mao kita nga katawhan sa Dios. Kinahanglan matukod kita diha kang Kristo kay kung kaniya kita matukod makahatag kita og dungog sa tagsa-tagsa. Kung matukod kita kang Kristo, walay magdinautay kondili mopanday kita aron mahimong balaan. Hinaot unta nga dili pagdautay ang mohari sa tagsa-tagsa kanato kondili ang pagtamod sa dignidad sa tawo. Hinaot unta nga ang Ginoo maoy papuy-on nato sa matag usa aron dili pagpamintaha kondili pag-alagad ang maghari.

Sa unang pagbasa, si Ezekeil gidala sa templo diin nakita niya ang nagdagayday nga tubig nga naghatag og kinabuhi. Kining maong tubig mao si Kristo nga nagpabunga sa matag tawo, ang bunga nga iyang gipakita sa ehemplo sa pag-ula sa iyang dugo alang kanato. Hinaot nga mobisbis unta ang atong mga taras ug lihok sa uban aron ang katilingban mabulahan ug dili lamang ang pipila. Hinaot nga ang matag usa mahimong sama sa tubig libot sa templo nga magpabuhi pinaagi sa maayo nga pag-atiman sa panginahanglan sa usa’g usa. Dili unta kita mauga ug mawad-an sa tubig tungod sa kauhaw sa panginhanglan sa kamatuoran, sa kamatinud-anon ug hustisya.

Busa, mahinlo unta kita pinaagi sa pagkaulaw sa pagpangawkaw. Matukod unta pag-usab dinhi kanato ang pagpuyo ni Jesus nga mao unta ang pondasyon sa matag usa. Maghatag unta kitag kinabuhi, inay kalisod ug kamatayon tungod sa kahakog. Makapahimuot unta kita isip lungsod sa Dios, ang balaang puy-anan sa Kahitas-an.