‘Dili lang ta mawad-an sa paglaum’ – Mati youth

Luyo sa hulga sa kinabuhi, ang “Mercy Cross” gidawat gihapon sa Simbahan sa Dabaw isip padayon nga paghandum sa Tuig sa Kaluoy.

Miabot ang “Mercy Cross” gikan Diocese sa Malaybalay, Bukidnon sa San Miguel Parish Marahan niadtong Setyembre 6. Giturn-over kini pinaagi ni Fr. Leomel “Jong” Puerto, DAYCA Director, Ryan Salaum, DAYCA Coordinator, vicariate youth coordinator sa Sacred Heart nga si Noel Parado, ug uban pang batan-on, seminarista sa Missionaries of Jesus, ug kura paroko nga si Fr. Jerry Charcos, ug parokyano sa Marahan.

Ang Cross gidala dayon sa The Most Sacred Heart of Jesus Parish, Calinan aron misahan pagkahapon kauban ang mga parokyano ug estudyante sa Holy Cross College of Calinan.

ANG HULAGWAY SA CROSS
Gipailaila ang YOUCAT coordinator nga maoy guardian sa cross sa pagtuyok niini nga si Randy Fuentes. Siya maoy mipaambit bahin sa cross. Matud niya, “ang disenyo sa Cross mao ang mga imahe sa 7 Corporal Works of Mercy ug sa tunga niini mao ang relics nga lima ka bato gikan sa lugar ni Hesus diin siya gipanganak, Nazareth kung asa siya ningdako, Garden of Gethsemane diin siya nag ampo, ug midawat sa iyahang misyon, Mt. Calvary diin siya gilansang sa krus ug namatay, ug sa Holy Sepulcher diin siya gilubong ug nabanhaw.”

Pagkahuman sa misa, ang Cross gidala na sa San Pedro Cathedral. Gisugdan ang vigil ug Taize Prayer sa Sto. Rosario ug Immaculate Conception Vicariate, Sacred Heart Vicariate, St. James Vicariate, San Pablo Vicariate, ug San Pedro ug Sta. Ana Vicariate.

Gidala ang Cross sa Diocese of Mati inubanan sa Youth Catechist Philippines Director nga si Randy Fuentes, ug 2 ka kaubang volunteers nga sila Paul Fredmark Nolada gikan sa Diocese of Kalibo, Aklan ug Joan April Chang gikan Diocese of Antipolo.

“Na overwhelm ako ug nagmalipayon nga bisag naay nabating gamay’ng kakapoy, paghuman sa adlaw nagmalipayon akong makakita sa mainitong pagdawat sa mga tao sa krus ug kini nakapawala sa kakapoy nga iyang mabati,” dugang pa ni Randy.

ANG PAGBISITA SA MATI
Gidawat ang Mercy Cross sa Diocese of Mati pinaagi sa pagsayaw sa “Echoes of Mercy” sa mga animators didto sa Davao Oriental Welcome park.

Human sa pagdawat ni Fr. Caloy, ang kura paroko sa San Isidro Labrador Parish- Banay-Banay, giprusisyon ang krus padulong sa parokya sa Banay-banay. Kini gidala sa Parokya sa Lupon, ug uban pang parokya sa diyosesis sa Mati, ug sa Provincial Jail.

Gibalik nganhi sa Archdiocese of Davao ang Cross sa St. Joseph the Worker Parish sa Sasa diin padayon kining gipasidunggan.

Matud pa ni Mitch Masucol, ang Diocesan Youth Coordinator sa Diocese of Mati, “nagmapasalamaton ako sa Ginoo ug sa among apostolic administrator, kaparian, ug sa apostolado sa batan-on sa pagdawat niini. Adunay pagtinabangay ug panaghiusa sa pagdawat. Unta sa kanunay adunay Ginoo sa atong Kinabuhi nga andam maluoy. Dili lang ta mawad.an sa paglaum kay adunay buhi nga dios nga nagtan.aw ug naghatag kanato sa tanang grasya.” (Gie Jadulco | Nash Nacion)