Sagop Kinabuhi Program 2 Launched

Save lives, save souls

Ang Amahan sa Sagop Kinabuhi Program 2 nga si Fr. Bong Gonzaga nagkanayon, “basig dili lang kita moluwas og mga kinabuhi, lakip usab mga kalag.”

Kaniadtong kura paroko pa siya sa San Antonio de Padua Parish sa Agdao tuig 2000, aduna nay daghang mga batan-on nga gitawag ug “rugby boys” nga nahilambigit sa daghang krimen sa lugar: pagpangawat, dili pagtuman sa curfew, rape, ug murder.

Daku ang kabalaka ug daghan ang reklamo gikan sa mga lumulopyo tungod sa mga krimen ug patay sa mga addicts, apan ang pangutana ni Fr. Bong, “duna ba tay gihimo bahin ani?”

Didto nahimugso ang Sagop Kinabuhi Program 1 kon SKP 1 sa Agdao. Tumong sa SKP 1 mao ang pagluwas sa kinabuhi sa mga batan-on gikan sa pagka-adik ug usab ang pagluwas sa kinabuhi sa mga lumulopyo kanila.

Human ang pipila ka tuig, ang SKP 1 nahimong malampuson tungod sa suporta sa mga nagkalain-laing grupo sa katilingban sa Agdao, ug sa lokal nga gobyerno.

Karon, tungod sa kadaku sa problema sa droga, gilusad ang Sagop Kinabuhi Program 2 pinangunahan sa Archdiocesan Social Action Center (ASAC) sa Arkidayosis sa Dabaw ug sa University of Southeastern Philippines niadtong Oktobre 7 sa San Pablo Parish.

Matud pa ni Sr. Marissa Arado sa ASAC, “kini human ang pagplano ug paghanas sa assessment skills sa mga nag boluntaryo gikan sa 14 ka barangays, 10 gikan sa mga parokya, 14 gikan sa City Social Services and Development Office (CSSDO), ug 5 ka pulis. Sila ang nitabang aron sa pagpili sa 130 ka VSRs gikan sa Talomo District.”

Miapil sa paglusad ang mga representante sa cooperating and program partner agencies sa SKP 2: 14 ka barangay, 7 ka parokya sa Talomo District, Department of Social Welfare and Development (DSWD) Region XI, (CSSDO), Department of Health (DOH), City Health Office, Philippine National Police, Davao City Police Office, TESDA, DOLE, DTI, Liga nga mga Barangay, DACS, DCCCI, Knights of Columbus ug DILG.

Nakighiusa sa Simbahan ang mga pribadong sector ug gobyerno aron sa paghimo ug mga pamaagi nga matabangan ang mga mi-surender nga nahilambigit sa druga sa pagbag-o sa ilang kinabuhi.

Sa interview sa DXGN, gisaysay sa Community Extension Director sa USEP nga si Dr. Mervin Gascon nga ang eskwelahan mutabang usab sa assessment, “meaning atong ginatabangan ang p’wedeng dawaton sa programa, katong mga VSRs nga mapamatud-an nga mild to moderate lang ilang stage.” Dugang pa ni Gascon nga dili pa ulahi ang tanan aron ang mga VSRs mahibalik sa kinabuhi sa katilingban pinaagi sap ag eskwela. “We are helping in the process of retooling them and putting them into livelihood training; never too late for basic education through Alternative Learning System.”

Ang SKP 2 mao ang tubag sa daghan kaayong nagsurrender nga mga nagagamit ug nagatulod ug mag iligal nga droga, nga karon giila nga Voluntary Submission for Reformation (VSR) persons nga resulta sa gubat batok droga nga gilunsad sa kagamhanan.

Gidisenyo kini aron makatampo sa paningkamot sa daghang sector nga mahiuli ug mahiusa ang mag VSRs sa ilang matag pamilya ug katilingban. (Johnny Sulit | SPP SoCCom With report from Marian Raquel | Cheng Vilog)