Sa kabus walay kwarta, sa ghost projects duna

Bisag Unsa

Ang P 10B pork barrel scam nadiskubre sa dihang nagkasumpaki na ang mga nagdumala ug ang mga empleyado sa usa ka kompanya nnga may kalabutan sa scam. Matud pa, ang pork barrel gigamit ngadto sa mga peke nga mga NGO’s, ghost projects, peke nga pirma/dokumento. Napulo na kuno kini ka tuig nga operasyon, apan bisan ang opisina sa COA nga mao ang magsusi sa projects ug sa paggasto sa kwarta wala mahibalo. Mas maayo pa, ipa-abolish ang COA. Ang mga senador moingon kumpleto kuno ang ilang records sa mga transactions. Sa ato pa, walay bali kung peke ang mga projects ug ang mga NGO’s basta duna silay records? Kung tikasan sila sa elections, mo-protesta dayon sila, apan kung tikasan sila sa ilang pork barrel dili sila mosaway. Gani, wala silay tingog? Ang gobyerno uyon sa RH Law aron kuno mokunhod ang mga kabus! Walay kwarta alang sa mga kabus! Hinonoa, dunay kwarta alang sa mga ghost projects pinaagi sa pork barrel.

Ang matag senador dunay pork barrel nga P 200 million ug ang Congressman P 70 million. Ipadayon ang pork barrel sa mga kongresista tungod kay duna silay klaro nga territorial area apan ang mga senador tibuok Pilipinas nga dunay mga congressmen. Busa dili na kinahanglan nga ang mga senador hatagan pa og pork barrel. Ang ilang pork barrel ug sa Presidente idugang na lang sap undo sa CCT ug alang sa mga senior citizens nga nagkinahanglan. Karon, daghan pa kayo ang mga kabus nga pamilya nga wala pa maapil sa programa sa CCT sa DSWD. Daghan pa pod mga dapit nga walay eskwelahan, artesian wells, ug mga serbisyo sa gobyerno. Ang uban nagpuyo sa ilalum sa mga tulay, sa daplin sa dagat ug mga canal. Sa gipakita sa programa sa telebisyon, mga mga bata sa bukid nga nag-skwela apan walay mga papel busa ang ilang gigamit dahon sa saging.

Sa CCT kinahanglan dunay transparency. Sa pork barrel, mas maayo nga dunay transparency o publication. Sa pagkatinuod ang COA sukad kaniadto hangtud karon dili gayod epektibo batok sa mga corruption sa gobyerno. Kung dunay transparency sa mga transaksyon sa gobyerno, nan, dili na kinahanglan ang Commission on Audit.

Fernando A. Saludes