Pagbag-o sa kaugalingon

Ika-26 nga Domingo sa Ordinaryong Panahon
Am 6:1, 4-7 / Ps 146:7, 8-9, 9-10 / 1 Tim 6:11-16 / Lk 16:19-31

Naay mga higayon nga wala nato tagaig pagtagad ang mga nanginahanglan bisan pa kabalo kita nga naa kitay ikatabang. Atong gibaliwala ang mga tawo nga nanginahanglan kay tungod malipayon ta sa atong kinabuhi ug maayo atong kahimtang diin kini usa ka hakog nga panghuna-huna ug kitang tanan sad-an aning mga butanga gamay man o dako. Nganong lisod kanato ang mutabang? Murag wala kanato ang gitawag nga “sense of belongingness” kung sa mga taga Bohol pa “ija-ija ug aho-aho” ra kita.

Sa among balay usahay makonsensiya ko kung naa mi daghang pagkaon pero ni bisan usa kanamo wala may nakahuna-huna og pagpanghatag hangtod sa nadaot nalang. Usahay mahilig sab kita magpundo og mga pagkaon sa balay hangtod nga makaamgo kita nga dili diay kinahanglan, ug ang uban nadaot na sa kadugay.

Apan bisan pa naa gihapoy mga tawo nga kanunay andam nga mutabang sa makaya nilang mabatang ug bulahan kadto sila nga buotan gayud nga kabalo manghuna-huna sa uban mga tawo nga nagkinahanglan og tabang. Apan naa pud uban nga mohatag nga nagpaaron-ingnon lang. Muhatag man galing pero naay pakapin nga picture taking ug ipa-post sa social media ug makita sa uban nga buotan kuno.

Sa atong Ebanghelyo si Hesus nisulti na usab ug usa ka sambingay mahintugod sa dato nga tawo ug si Lazarus nga pobre ug namatay silang duha. si Lazarus gi-alalayan sa anghel ug nitapad kang Abraham. Apan ang aduhan nga tawo nag-antos pag-ayo ug nagpakiluoy kang Abraham. Atong mahinomduman sa ubang mga Ebanghelyo kung unsa kaduol ang kasing-kasing ni Hesus sa mga kabos ug mga gidaog-daog. Kining datung tawo sa ebanghelyo karon nagsige og pakilooy kang Abraham. Kung sa tagalog nga pinulongan pa “nasa huli ang pagsisisi.”

Sa atong unang pagbasa gikan sa basahon ni Amos iyang gisayaw ang mga tawong garboso kaayo, nagpuyo sa haruhay sa Samaria. Mga dagkong tawo sa Israel ug kini sila mao ang ma-hiuna sa nga mabihag inig abot sa mga kaaway ug ang ilang mga kasadya matapos na.

Apan bisan pa sa atong mga kahuyang sa kinabuhi kita gihagit sa Ginoo diha sa atong ikaduhang pagbasa sa pagpaningkamot kutob sa atong mahimo nga makadaog kita sa lumba sa pagtuo ug paghupot sa atong kinabuhing walay kataposan kay gitawag kita sa Dios alang sa maong kinabuhi sa dihang gisugid ta ang atong pagtuo atubangan sa daghang mga saksi. Dili kita magpaabot sa panahon nga moatubang kita sa Diyos nga nagbasol tungod sa atong mga kalapasan. Ang atong mga pagbasa nihagit kanato sa kanunayng pagbag-o sa kaugalingon. (Mark Joy Guantero Basallajes, OFM)