Angay bang kahadlokan ang taliabot nga adlaw sa Ginoo?

Ika-33 nga Domingo sa Ordinaryong Panahon
Mal. 3:19-20 / Ps. 98: 5-6. 7-8. 9 / 2 Thes. 3: 7-12 / Lk. 21: 5-19

Kun makadungog kamo ug mga istorya mahitungod sa pag-abot sa Ginoo, unsa may inyong bati-on? Siguro, nagkadaiya ang pagbati. Adunay sa panahon sa kalaglagan, katapusan sa kalibutan, kamatayon, paghukom, kangitngitan ug uban pa. Kung kini ang paghulagway, makaingon kita nga unta maglangan ang Ginoo sa iyang paghari o dili na lamang unta Siya moabot.

Sa unang binasa, si Propeta Malachias naghisgot sa paghukom sa mga daotan. Niadtong panahona, nagpasagad na lamang sila sa ilang kinabuhi ug nagpuyo sukwahi sa ilang kasabotan tali sa Dios. Wala nila gihatag sa Dios ang halad nga angay. Siya miingon, “ang adlaw moabot nga ang tanang mapahitas-on ug daotan sunugon sama sa dagami.” Midugang siya sa pag-ingon nga “ang tanan kanila mangasunog ug wala gayod mabilin kanila.”

Ang ebanghelyo naghisgot sa ikaduhang pagbalik sa Mesiyas diin ang tanan mahiusa ubos sa paghari sa Dios. Gitagna ni Hesus ang pagkaggun-ob sa templo sa Jerusalem: “moabot gayod ang panahon nga walay bisan usa ka bato nga magpabilin niini; ang tanan tumpagon gayod.” Siya nagpahimangno nga magbinantayon kay daghang muangkon nga siya mao ang Cristo. Moabot ang mga kagubot ug pagpanglutos. Apan dili kinahanglan mahadlok kay mag-uban man siya.

Angay ba gayod nga kahadlokan ang taliabot nga adlaw sa Ginoo?

Mga igsoon, dili gayod kahadlokan ang adlaw sa Ginoo. Si San Pablo nag-awhag kanato sa ikaduhang binasa sa pagpangandam sa pagbalik ni Kristo. Giusikan sa mga taga-Tesalonica ang panahon pinaagi sa dili pagtrabaho tungod nagtoo sila nga hapit na gayod mobalik ang Mesiyas. Daghan kanila ang wala nay laing gihimo gawas sa pagpanghilabot sa buhat sa uban. Mao nga gipanghimangnoan niya sila, nga ang pagabot sa Ginoo dili mamahimong babag sa ilang mga gimbuhaton.

Isip mga sumusunod ni Kristo, kita usab gitawag sa pagpuyo dili sa katapol, kondili sa pagpakamatay sa tawhanon kaibog ug sa sala, aron magpakabuhi nga Kristohanon. Paglig-on diha sa pagtoo pinaagi sa makanunayon nga pag-ampo inubanan sa pagpanghimulos sa mga Sakramento sa Pakig-uli ug Eucharistiya. Likayi ang pagkahakog ug uban pang matang nga makapahimulag sa Dios. Pangandam sa inadlaw-adlaw nga pag-abot ni Hesus kinsa kanunay nagtuktok sa atong kasingkasing aron maghinulsol ug magbag-o.

Imbes nga kahadlok ang maghari, giawhag kita sa pagsusi sa kanunay sa atong kaugalingon kon nagpuyo pa ba kita subay sa kabubut-on sa Dios. Mag-ampo kita aron magmalig-on sa pagtoo kay kun kita nagmalahutayon kita maluwas sama sa gisaad ni Hesus kanato. (Rev. Michael Ondras)