Palawmi ang imong kaayo

Ikaunom nga Domingo sa Ordinaryong Panahon
Sir 15:15-20 / Ps 119:1-2, 4-5, 17-18, 33-34 / 1 Cor 2:6-10 / Matt 5:17-37

Kumusta man ang imong pagsubay sa kaayo? Lalom na ba kini?

Sa unang pagbasa kita gipahimangnoan nga ang matag usa dunay gahum sa pagpili. Pagmata pa lang nato sa buntag, makapili na kita kung mobangon na ba o mopadayon pa bag tulog. Makapili ta kung unsay atong lutoon, isada ba o itlog kung naa. Makapili ta kung paksiw ba o prito ang pagluto sa isda. Sa laktod nga pagkasulti, gigamhan kita sa Ginoo nga mopili. Nan, kon mao kana, nganong dili mo man pilion ang maayo? Nganong dili mo na man lang pilion nga ikaw magmalipayon, o makaalagad sa uban o makasunod sa iyang sugo?

Sa ikaduhang pagbasa kita gihagit ni San Pablo sa pagsusi sa kaalam nga gipadayag na sa Ginoo. Isip mga tumotuo kang Kristo, kitang tanan adunay katakos nga mamati, mamalandong, modiskubre ug mokat-on sa kaalam nga wala hisayri sa mga maalamon niining kalibotan. Nabati mo ba nga ang mga matuohon bisan sa hulga sa linog o kaha sa sakit nga corona virus adunay pagsalig nga kining tanan adunay mensahe nga mosangpit kita kanunay sa Dios?

Ug sa Ebanghelyo kita giawhag sa pagpalalom sa atong kaayo pinaagi sa dili lamang paghimo sa mga balaod kutob sa mga pulong niini, kondili sa pagpatuhop niini sa atong kasing-kasing. Ang tawo nga nakapalalom sa kaayo malipay nga mobuhat sa sakto bisan walay nakakita kaniya. Siya malipay nga magmatinud-anon bisan walay nagbantay sama sa mga polis ug awtoridad. Ang tawong lalom ang kaayo wala nagpaabot nga mobuhat sa matarong bisan walay mobuyag kaniya. Nagtarong ka ba sa pag-drive kung dunay polis? Naglikay ka ba sa pagpangawat tungod nahadlok ka sa security guard? Wala ka ba nangopya o nagkodigo isip estudyante kay anaa ang meastra nga nagbantay? Kung dinhi lamang kutob ang imong pagtinarong, wala ka pa makapalalom sa imong kaayo. Kay ang tawong lalom sa kaayo molabaw pa sa mga Eskriba ug Pariseyo.

Palawmi ang imong kaayo.