Lahi ra gyud ang Kristiyano

Ika-pito nga Domingo sa Ordinaryong Panahon
LV 19:1-2, 17-18 / Ps 103:1-2, 3-4, 8, 10, 12-13 / 1 Cor 3:16-23 / Mt 5:38-48

Dili ba may dakong purohan nga ang masagpaan og kausa mobalos ug kaduha? Ang masagpaan kaduha mobalos napud kaupat? Ug ang masagpaan kaupat dili paalakansi managpa napug kawalo? Kini ang kadena sa pagpanimalos. Walay maayong sangpotan kondili ang dugang nga pagpasakit sa usag usa.

Binase sa kasinatian, mihagit si Hesukristo diha sa Ebanghelyo karon nga nahisakop sa bahin human sa iyang pagpanudlo mahitungod sa mga bulahan. Kining hagit dili lamang sa paghunong sa pagpanimalos kondili ang pagmahal sa mga kaaway. Ang tinuod nga magtutuo, molabaw pa sa kasagaran. Dili siya sama sa uban nga motagad lamang niadtong maayo kaniya ug mopangga lamang sa mga mopangga usab kaniya. Bisan sa mga dili makabayad, ang tinuod nga Kristiyano mohimo sa maayo.

Ang sukaranan niini mao nga ang matag usa kanato, sama sa gisaysay sa ikaduhang pagbasa, mga templo sa Ginoo. Kung ang Ginoo gitugotan nato nga mopuyo sa atong kinabuhi, ang atong kanunay nga tinguh mao nga mapahimuot nato siya pinaag sa maayong pagtagad kanunay sa usag usa. Dili kita buot nga mangilad ug manlimbong sa isigkatawo kung nahinumdom kita ug mibati kita nga ang Dios anaa kanato.

Busa, sundon ta ang gisulti sa unang pagbasa nga maglikay unta kita sa pagdumot. Dili unta nato tugotan nga madala kita sa kalagot, ug nga makasala kita tungod sa atong dili mapugngan nga kasuko. Ang Ginoo mismo maoy mihangyo nga siya isip Dios, kinahanglan mahatagan og respeto pinaagi sa pagmahal sa isigkatawo.

Hinumdoman lamang nato kanunay nga kung kita nasakitan tungod sa gihimo sa uban, kita usab baya nanginahanglan sa pasaylo kay dili usab kita hingpit, masayop usab. Nan angay unta nga mosabot kita sa kahuyang sa uban. Usa ra usab ang atong gigikanan nga mao ang Dios nga naglalang kanatong tanan. Sama sa sakit o kalamidad nga motakboy ug moatake kanato, pantay kitang tanan atubangan sa Dios nga nanginahanglan sa iyang panalangin. Nan, angay lamang nga mobati usab kita sa gibati sa uban. Kanunay kitang maninguha nga mahingpit sama sa Amahan. Lahi ra gyud ang Kristiyano.