Pagkamapaubsanon, paagi sa paghigugma

Domingo sa Lukay
Is 50:4-7 / Ps 22:8-9, 17-18, 19-20, 23-24 / Phil 2:6-11 / Matt 26:14–27:66

Karong Dominggoha atong ginasaulog ang Dominngo sa pagbendita sa lukay o Palm Sunday. Kini mao ang paghandum nato sa pagsulod ni Hesus ngadto sa Jerusalem aron iyang pagahimoon ang iyang pinakadakong buhat sa pagpangluwas, nga mao ang iyang pagpasakit, kamatayon, og pagkabanhaw.

Ang pagsulod ni Hesus sa Jerusalem usa sa pinakakongkreto nga imahe sa pagkamapaubsanon. Si Hesus nasayod na sa tanan nga mahitabo kaniya inig sulod niya sa Jerusalem. Nasayod na siya nga siya pagabudhian ni Judas, nasayod na siya nga siya isalikway ni Pedro, nasayod na siya nga pagatamayon siya sa mga tawo nga misugat kaniya, og nasayod siya nga makasinati siya og kasakit og kamatayon.

Bisan pa kon nasayod na si Hesus niining tanan, mipadayon gihapon siya sa iyang lakang padulong sa katumanan sa kabubut-on sa Amahan alang kaniya. Kay niining paagiha, mapakita ni Hesus ang paghigugma niya sa Amahan ug ang pag-higugma niya kanatong tanan.

Kung atong sudlon ang pagbati ni Hesus sa pagdawat niya sa iyang kapalaran, atong makita nga aduna usab siyay mga kalisdanan sa pagdawat niini. Kini atong makita sa panghitabo ngadto sa tanaman sa Gethsemane, diin siya nag singot og dugo samtang siya naga-ampo ngadto sa Amahan, aron pagpadayag sa iyang kaguol, kahadlok ug kabalaka sa iyang pagadangatan nga kamatayon. Apan kining mga butanga nabatukan ni Hesus pinaagi sa pag-paubos sa iyang kaugalingon pinaagi sa paghalad sa iyang kinabuhi alang sa uban. Kini nagtudlo kanato nga makahimo lamang kitang makapadayag sa atong paghigugma sa uban, kung kita mapaubsanong mahikalimot sa atong kaugalingon alang sa atong hinigugma.

Sa pagpakita ni Hesus sa iyang dakong gugma kanato, kita kanunay gitawag sa paghimo sa susamang pagpadayag sa gugma. Karong panahona mas maipakita nato kini, niining sitwasyon nga atong nasinati karon. Ang hulga sa atong panglawas nakahatag og kalisang ug kabalaka. Gani kini naka pabalda kanato nga usahay kawad-an na kita sa paglaum. Apan atong hinumduman nga ang Ginoo andam mutabang kanato sa kanunay. Ang pagpalansang ni Hesus sa Krus mao ang dakong timaan sa iyang pagtabang kanato. Ang Krus ni Hesus mao ang simbolo sa paglaum nga gihatag niya kanato.