Ang Dios mianhi dili aron pagsilot kondili aron pagluwas kanato

Solemnidad sa Santisima Trinidad (June 7, 2020)
Ex 34:4-6, 8-9 / Dan 3:52, 53, 54, 55, 56 / 2 Cor 13:11-13 / Jn 3:16-18

Sa mga panahon sa krisis, ang uban kanato makaingon nga gisilotan naman tingali kita sa Ginoo. Ang uban usab maghuna-huna nga gipiktan man siguro kita sa Ginoo kay nahikalimot man ang tawo kaniya. Kung unsa man ang atong huna-huna o ikasulti panahon sa krisis atong hinumdoman nga ang Dios mianhi dili aron pagsilot kondili aron pagluwas kanato.

Sa unang pagbasa, ang Dios nagpaila nga siya nagauban kanato. Taliwala sa tig-a nga kasing-kasing, si Moises misalig nga ang Dios dili mobiya sa iyang katawhan. Gani mihatag siya sa iyang mga sugo aron mogiya ug motultol kanato sa atong panaw. Gihagit usab kita karon sa pagsubay pag-usab sa hustong dalan, sa paglikay sa walay tumong nga lakaw, sa padayon nga pag-ampo ug sa dili na pagpatuyang sa kalingawan labina nga adunay may curfew.

Sa ikaduhang pagbasa, si San Pablo sa iyang pagpanamilit sa mga taga Corinto, nag-ampo sa pag-uban kanunay sa grasya sa Ginoo kanila. Ang pag-uban sa Ginoo ilang mapakita diha sa pagpangumostahay sa matag-usa, sa ilang pag-ambitay ug panagdait. Kini usab ang hagit nato niining panahon sa COVID. Kinahanglang magkumustahay kita isip pagpakita sa atong panagdait niining kalisod karon. Kinahanglan ta ang pagtinabangay.

Sa Ebanghelyo, giklaro ni San Juan nga kung motuo lamang kita, maluwas gayod kita. Ang tawo nga dunay pagtoo mobati gayod sa pag-uban sa Ginoo bisan pa sa mga kapait sa kinabuhi. Apan sa tawo nga walay pagtoo, halayo gayod alang kaniya ang Ginoo bisan pa sa daghang kaayo nga iyang masinati. Palabihon unta nato ang atong pagtoo sa Dios ug bation ta nga siya nag-uban nato dili aron mopasakit ug magpaantos kanato kondili aron pagtabang ug pagluwas kanato sa mas pait nga kinabuhi sa pagpakasala ug kangitngit sa walay Dios.

Taliwala niining krisis nga atong giatubang dili nato kalimtan nga ang Dios nagtanyag kanato sa iyang makanunayong presensiya. Dili kita mobiya kaniya kay siya mianhi dili aron sa pagsilot kondili aron sa pagluwas kanato.