Solemnidad sa Balaang Lawas ug Dugo ni Kristo

Solemnidad sa Balaang Lawas ug Dugo ni Kristo (June 14, 2020)
Deut 8:2-3, 14-16 / Ps 147:12-13, 14-15, 19-20 / 1 Cor 10:16-17 / Jn 6:51-58

Kining Solemnidad sa Balaang lawas ug dug ni Kristo nagpunting sa matuod nga presensiya ni Kristo sa Eyukaristiya. Nagpahimumdom kini kanato sa tulo ka mga punto:

Una, nga ang presensiya sa Ginoo sukad pa sa sinugdan hangtod karon. Gipukaw ni Moises pag-usab nga sulod sa 40 katuig ang Ginoo nagpanaw uban sa piniling katawhan didto sa disyerto. Sa ilang kalisod ang Ginoo miduyog, sa ilang kagutom ang Dios nagpakaon, sa ilang pagkaulipon ang Ginoo mipalingkawas kanila, sa ilang kauhaw ang Ginoo nagtagbaw kanila. Busa kon kita naglisod tungod sa COVID o gigutom o giuhaw o naulipon, dad-a kanang pagtoo nga ang Ginoo mopakaon ug mopainom, mopalingkawas ug motagbaw sa imong kahingawa. Mosalig lamang kaniya uban sa paningkamot ug pagkugi.

Ikaduha, diha sa pag-inambitay ug partisipasyon anaa ang kahiusa. Ang pagpikaspikas sa pan nagpasabot sa panag-ambit sa grasya ni Kristo. Sama nga ang daghan parte managlahi, ang tanan misalmot sa usa ka lawas ug nagtibuok niini. Diha lamang usab sa atong partisipasyon sa gobyerno, sa simbahan, sa mga pribadong ahensiya atong maangkon ang kalingkawasan sa bisan unsang suliran. Kung mosalig lamang ang matag usa sa paningkamot alang sa kaayohan inay mobagulbol ug mosaway, sa hinay-hinay ang katilingban maluwas ug molambo.

Ikatulo, bisan pa man sa pagkakaron nahikawan kita sa pipila ka bulan sa pagsalmot sa Eyukaristiya tungod sa COVID 19, ang mga pulong sa Ginoo kanunay natong mabasa ug madungog. Ang presensiya ni Kristo anaa sa iyang lawas ug dugo ug mokaon sa iyang lawas ug moinom sa iyang dugo mabuhi sa dayon. Ang iyang presensiya ato usab nga masinati diha sa buhi niyang pulong. Sama sa iyang lawas ug dugo, ang iyang pulong atong kalig-on ug kahayag. Kung naluya man ta, kung mingitngit man ang atong palibot tungod sa krisis karon, tugotan ta ang iyang mga pulong nga mopabuhi, mogiya, modan-ag sa matag usa kanato.

Ang atong espirituhanong pakighiusa sa Ginoo niining panahon sa krisis maghatod unta kanato sa pagbati sa iyang gamhanang presensiya nga sa kanunay nagauban kanato. Ang iyang mga pulong mag-agak unta kanato kanunay sa dalan sa pakigsuod isip mga bahin sa iyang lawas.