“Ang Pagtuman sa Balaod sa Dios sa Kinasingkasing gayod”

Ika-22 nga Domingo sa Ordinaryong Panahon (August 29, 2021)
Dt 4:1-2, 6-8 / Ps 15:2-3, 3-4, 4-5 / Jas 1:17-18, 21b-22, 27 / Mk 7:1-8, 14-15, 21-23

“Ang naghimo sa katarungan nagapuyo diha sa atubangan sa Ginoo.” Kini mao ang tubag sa atong Salmo karong Domingoha nga diin gipahinumduman kita sa pagsunod sa kabubut-on sa atong Ginoo ug dili ang mga sugo sa tawo lamang. Ang awhag sa pagpuyo sa pagkamatarong atubangan sa Ginoo usa ka hagit nga diin gipuy-an sa atong Ginoong Jesucristo. Kini dako kaayo og kalambigitan diha sa atong pagkinabuhi ug pagsunod sa atong Ginoo sa iyang mga tunob isip iyang mga tinun-an.

Sa atong unang pagbasa, si Moises nagpahinumdom sa katawhan sa Israel nga magpabiling matinumanon sa mga sugo sa Dios kanila kay mao kini ang sukdanan, matud pa: “tumana ninyo kini, kay mao kini ilhanan nga kamo maalamon atubangan sa katawhan.” kini nagpamatuod nga ang Dios nag-uban kanila ug naggiya kanila pinaagi sa iyang mga balaod nga iyang guhatag kanila.

Dugang pa, sa atong ikaduhang pagbasa si Santiago nagpahinumdom nga kadtong walay pulos nga pamatasan angay nga isalibay ug ipuli ang pagkamapa-ubsanon “Busa isalikway ninyo ang tanang ngil-ad nga batasan ug dautang mga buhat, ug dawata nga mapaubsanon ang pulong nga iyang gitisok diha sa inyong kasingkasing kay kini makaluwas kaninyo.” Kining maong hagit dili lamang sa kuminidad nga diin si Santiago nagpuyo apan kini alang kanatong tanan nga mga misunod kang Cristo.

Sa Ebanghelyo ni San Marcos, gustong ipakita sa mga Pariseo ug pipila ka mga magtutudlo sa balaod nga ang makapahugaw sa tawo mao ang iyang gikaon. Gani sila miingon kang Jesus “ngano ba nga ang imong mga tinun-an wala man magtuman sa mga sugo nga gibilin sa atong mga katigulangan, kondili nangaon hinoon nga hugaw og kamut?” kining maong pangutana murag nagtumong sa unang pagbasa nga diin mipahinumdom si Moises nga angay gayod nga sundon ang balaod nga gihatag sa Dios kanila.

Apan ang maong balaod usa ka interpretasyon og hinimo sa tawo lamang ug gipasunod sa mga Pariseo ug mga magtutudlo sa balaod. Sa dihang gikahibalag nila ang naghatag gayod sa maong balaod nga mao ang Pulong sa Dios nga nahimong tawo ug mihatag sa hustong interpretasyon kon unsa gayod ang kahulogan sa maong balaod. Apan wala sila mamati kaniya, mao nga si Jesus mitawag kanila nga mga tigpakaaron-ingon, dili matinud-anon nga mga kinaiya kay ila lamang gipakita diha sa ilang mga taphaw nga mga buhat ug dili sa tinuoray nga pagtuman sa balaod sa Dios.

Mga kaigsuonan, ang atong pagtuman sa balaod sa Dios dili lamang unta diha kutob sa gawas nga makita sa mga tawo apan motuhop unta diha sa atong mga kasingkasing ug maghimo kanato nga mga tinuod nga mga tinun-an sa atong Ginoo. Amen. (Bro. Soren H. Abellanosa)