Manlakaw kita nga malaumon uban sa Sagrada Pamilya

Nakasinati ka ba nga nawad-an sa paglaum? Giunsa man nimo paglingkawas sa malisod nga kahimtang?

Taliwala sa daghang mga kaso sa pagkawalay paglaum sa atong panahon karon, ang Tuig sa Hubileyo 2025 ug ang Sagrada Pamilya maoy atong kauban sa paglakaw niining kinabuhia.

Kini ang gilantaw sa kasaulogan sa Pangilin sa Sagrada Pamilya sa Parokya sa Baliok niadtong Disyembre 29, 2024 pinangulohan isip katilingban ni Padre Roger Duhaylungsod, kura paroko. Sa Santos nga Misa ni Arsobispo Romulo G. Valles, D.D., Arsobispo sa Davao, gidut-an niya ang pagsandig sa panig-ingnan ni Jose, Maria ug Jesus sa panaw sa kalisod. Sama kanila nga nakasinati sa kapait sa kinabuhi, ang ilang kasinatian nagdalag paglaum ug kahayag kanatong mga magtotoo.

Gisaysay sa pamalandong ni Arsobispo Valles nga sa tibuok Simbahan sa tuig 2025 nga nakasentro sa tema sa paglaum, kita mahimong mosubay sa dalan sa paglaum kung sama sa Sagrada Pamilya ang matag miyembro maghuna-huna sa kaayohan ug pag-alagad sa usa’g usa. Sama sa Sagrada Pamilya nga mikooperar sa plano sa Dios, mapuno kita sa paglaum nga kita usab makalahutay sa bisan unsang pagsulay.

Dinasig sa awhag ni Santo Papa Francisco, gipaningkamotan sa matag Gagmay’ng Kristohanong Katilingban sa maong parokya nga madiskubre unta diha sa tagsa-tagsa ka pamilya ang mga timailhan sa paglaum.