Higayon sa pag-ila Kaniya

Kapistahan sa paghalad sa Diosnong Batang Hesus (February 2, 2025)
Mal 3:1-4 / Ps 24:7, 8, 9, 10 / Heb 2:14-18 / Lk 2:22-40

Ang mga ginikanan mao ang giingon nga unang magtutudlo sa ilang mga anak. Kung ang mga ginikanan mag-atiman sa ilang mga anak nga adunay gugma sa Dios, ang ilang mga anak motubo nga maghigugmaon sa Dios. Kung sila magtudlo sa husto nga pamatasan, motubo usab ang mga anak nga magpakita niini nga mga kalidad o hiyas.

Gipadayag sa atong Ebanghelyo ang pagkamaayong panig-ingnan ni Maria ug Jose isip mga ginikanan ni Hesus diha sa pagtuman sa balaod sa mga Hudiyo sa paghalad sa bata ngadto sa templo ug ang inahan maghatag og halad aron magpahiluna human sa pagpanganak. Kining buhata makapadasig sa batang Hesus nga modako nga mahigugmaon sa Dios.

Apan gisaysay pod sa atong Ebanghelyo karon nga kining panghitabo dili lang bahin sa pagtuman sa ritwal o sa balaod. Kini usa ka lawom nga pagpadayag sa plano sa Dios alang sa kaluwasan sa kalibutan. Dili lang kini bahin sa pagka-maayong ginikanan ni Maria ug Jose, apan usab usa ka pagpadayag nga si Hesus mao ang Mesiyas nga gipadala sa Dios aron magluwas kanatong tanan.

Nasayran nato diha sa Ebanghelyo ang kalinaw nga gibati nila Simeon ug Ana sa paghalad sa Diosnong bata nga si Hesus sa templo. Mao kini ang dugay na nilang ginahulat, ang makita ang Mesiyas. Napuno sila sa pasalamat ug pagdayeg. Nakita nila ang kahimayaan sa Dios nga ilang gipangandoy. Kay nasayod sila nga ang presensya ni Hesus nagpasabot nga ang Dios kanunay mag-uban kanato ug kini magdala og kalinaw.

Busa, atong hinumduman nga ang Dios maga- uban kanato sa kanunay; diha sa kalipay ug bisan pa man sa atong kasub-anan, ug sa mga pagsulay anaa siya nga maghatag sa kalinaw ug kahupay. Hinaut nga ang atong mga buhat matag adlaw mahimong timaan nga ang Dios mao ang Dios sa kalinaw.

Mag-ampo kita nga sama nila Simeon ug Ana, mailhan nato si Kristo isip “kahayag ug kaluwasan” sa kalibutan, ug hinaut nga andam kita nga motahan sa atong kaugalingon diha kang Hesus uban sa malipayong ug mapasalamaton nga kasingkasing. (Sem. Roldan Baliano)