Ika-26 nga Kapistahan ni San Isidro Gisaulog

Malipayong gisaulog sa San Isidro Labrador Parish sa Catalunan Grande, Davao City and ika-26 nga kapistahan. Sa susamang adlaw, gisaulog usab ang ikaupat nga Dominggo sa Pagkabanhaw o gitawag nga “Good Shepherd Sunday” ug ang adlaw sa mga inahan kon “Mother’s Day.”

Gipanguluhan ang Santos nga Misa ni Most. Rev. Romulo G. Valles, D.D., Arsobispo sa Davao inubanan sa Kura Paroko nga si Rev. Fr. Maximo Bahinting, Rev. Fr. Voltaire Dimol, Rev. Fr. Ritzchild John Cariaga ug uban pang mga kaparian. Nagsugod ang Santos nga Misa sa alas nuybe ang takna sa buntag ug gitambongan kini sa mga parokyano nga nagpaambit sa ilang dakong kalipay ug pagpasalamat sa mga grasya nga nadawat uban sa pangama sa ilang patron San Isidro Labrador.

Gipaambit ni Abp. Valles ang dakong gugma ug pagmahal sa Maayong Magbalantay nga andam nga i-sakripisyo ang iyahang sariling kaugalingon alang sa iyang mga karnero. Ang espesyal nga misyon sa pagkamagbalantay sa panon sa Ginoo gitugyan sa atong Ginoong Hesukristo ngadto kang San Pedro ang unang Santo Papa ngadto sa kasamtangang Santo Papa nga Papa Leon XIV, mga obispo ug lakip na sa mga kaparian.

Si San Isidro Labrador tuod man usa ka mag-uuma apan siya usab adunay mga kinaiya sa usa ka maayong magbalantay pinaagi sa iyang pagtabang ug pagmatuto sa uban ilabina sa mga nanginahanglan.

Pagkahuman sa Santos nga Misa, adunay salo-salo sa gymnasium sa parokya diin malipayong nangaon ug nagtapok ang mga GKK Servant Leaders, lumilihok ug mga bisita.

Viva Sr. San Isidro Labrador!

(By Allyza Tabigue)