Mga Eksperto sa Panglawas Nagpahimangno sa Katalagman sa Vaping

Mipahigayon ang Philippine College of Chest Physicians (PCCP) og usa ka presentasyon atol sa Social Media and Evangelization Seminar nga gihimo sa Social Communications Committee (SoCCom) sa Our Lady of Lourdes Parish niadtong Mayo 25, 2025. Kini usa ka preview sa ilang pagahimuon nga kampanya nga adunay tema: “Say No to Tobacco & Vape Smoke” nga ilunsad karong Mayo 31, 2025.

Kini mitutok sa grabeng mga peligro sa panglawas nga dala sa paggamit sa vape ug uban pang e-cigarette. Gipadayag sa mga eksperto ang makahadlok nga datos, diin kapin sa kawaloan ka kemikal ang nasuta sa vape liquids ug aerosols. Lakip niini ang acrolein kini kaniadto gigamit isip kemikal nga armas niadtong World War I ug karon usa ka hinungdan sa permanente nga kadaot sa baga. Gibana-bana usab nga adunay formaldehyde or formalin, arsenic (lasong ilaga), acetone (kemikal sa nail polish remover), ug acetaldehyde (kemikal sa limpyo sa panimalay) nga kasagarang makita sa vape, nga nagdala og seryosong kadaot sa baga, utok, kasingkasing, atay ug kidney.

Gipatigbabaw sa presentasyon ang nikotina, nga usa ka kusog kaayo nga makapaadik nga substansiya nga anaa sa kadaghanan sa mga vape maski katong giingon nga “nicotine-free.” Ang sobra nga exposure sa nikotina mahimong hinungdan sa seizure, ubos nga presyon sa dugo, abnormal nga tibok sa kasingkasing, ug coma.

Giila usab sa mga eksperto ang peligro sa second-hand exposure ug ang seryosong balatian nga gitawag og E-cigarette or Vaping Product Use-Associated Lung Injury (EVALI). Sumala sa datos, halos 76% sa mga pasyente sa EVALI nanginahanglan og oxygen, samtang 26% ang nanginahanglan og mechanical ventilation. Ang dugay nga epekto sa EVALI naglakip sa problema sa pagginhawa, pagka-dili makahunahuna og tarong, ug mga problema sa mental health sama sa kabalaka ug depresyon.

Gihatagan usab ug gibug-atonan sa PCCP nga dili luwas ang vaping isip alternatibo sa sigarilyo, ilabi na sa kabatan-onan. Ang vaping nalambigit sa pagtaas sa kaso sa COPD (Chronic Obstructive Pulmonary Disease) ug sa “popcorn lung” (bronchiolitis obliterans)—usa ka permanente ug seryosong sakit sa baga.

Tungod niini ang PCCP maglunsad sa “SAY NO TO TOBACCO & VAPE SMOKE” campaign karong Mayo 31, 2025. Isip mga social communicators, sila nanghinaut nga ato silang tabangan sa maong kampanya aron mapahinay ang paggamit sa tabako og vape ilabi na sa mga kabatan-onan. (Matthew Cadanilla & Rowena Baldoza Villaflor, OLLP SoCCom)