Siya ang tag-iya

Solemnidad sa Balaan nga Trinidad (June 15, 2025)
Prv 8:22-31 / Ps 8:4-5, 6-7, 8-9 / Rom 5:1-5 / Jn 16:12-15

Niining panahon karon, ang matag usa gitintal nga manag-iya. Ang matag usa buot moangkon sa kabtangan, sa gahum, sa pagmando ug sa uban pang mahimong iyahon. Mao nga ang walay maiya nawad-an sa paglaum.

Apan ang Dios diha sa Ebanghelyo nagpasalig nga ang Amahan, Anak, ug Espiritu Santo maoy adunay kumon nga pagpana-iya sa tanan. Ang lain-laing persona sa Amahan, Anak ug Espiritu Santo walay pag-ilogay, ni kahakog ug kompetensya. Hinunoa, naa ang pag-ambitay ug panaghiusa. Ikaw ba nahimong instrumento sa pag-ambit ug panaghiusa?

Sa unang pagbasa, ang tanan gibuhat sa Amahan. Ang Amahan nagbuhat uban sa Anak ug Espiritu Santo. Ang tanan nga atong makita, ang Ania sa kalibotan gimugna sa nagkahiusa ug usa nga Ginoo. Walay dili niya gihimo. Ikaw ba nahinumdom ug misalig nga ang tanan pwede nga mahimo kauban ang isigkatawo inay panag-ilog g kumpetensya?

Sa ikaduhang pagbasa, bisan sa kasakit anaa ang Dios, kay Siya dili mapakyas. Ang paglaum nakasukad sa gugma sa Dios nga usa, nga kanunay miangkon sa matag usa. Busa sa mga pagkulang, ug kasakit nga kasinatian, angkonon gihapon nato ang atong pagkamanagsuon. Dawataon nato sa pagtinabangay ang matag usa, inay biyaan ug hukman. Diha sa Dios, dunay paglaum. Ikaw ba misandig nianang gugma sa Dios nga dili mapakyas?

Kung ikaw giangkon sa Dios, nagpuyo ka sa paglaum. Dili kana mangilog ug nagpuyo sa kahakog, dili mag-iyahay ug magpaunhanay, kay nasayod ka man nga kining usa ka Dios katingalahan ang iyang ngalan sa tibuok kalibotan.