Bulahan ang Tawo nga Mitubag sa Dios nga Nagpadayag

Ika-16 na Domingo sa Ordinaryong Panahon (July 20, 2025)
Gn 18:1-10 / Ps 15:2-3, 3-4, 5 / Col 1:24-28 / Lk 10:38-42

Nakita mo ba ang pagpadayag sa Dios nga angay’ng tubagon? Nabati mo ba ang iyang tanyag sa iyang presensiya sa imong kinabuhi?

Pagkabulahan sa tawo diin ang Dios mipadayag. Kini atong nadungog diha sa Ebanghelyo sa yano nga pagbisita ni Jesus ngadto sa panimalay nila Maria ug Marta. Si Jesus kinsa misaka sa balay sa managsuon, gialagaran sa lain-laing pamaagi ni Marta ug Maria. Sila mitubag sa pagduol ni Jesus kanila. Kita usab kanunay nga gibisitahan sa Dios matag adlaw. Siya moanhi kanato nga naghulat nga atong tubagon pinaagi sa paggahin og panahon sa pagpamati kaniya diha sa pag-ampo sama sa gibuhat ni Marta. Siya malipay nga pakitaan nato sa atong pagkugi nga walay pagbagutbot.

Pagkabulahan sa tawo nga gihapitan sa Dios. Kini atong nasayran diha sa unag pagbasa diin ang Ginoo miagi kang Abraham pinaagi sa tulo ka tawo o anghel. Ang Dios mipasalig nga si Abraham ug iyang asawa makabaton sa grasya sa usa ka anak. Misanong si Abraham sa presensiya sa Dios pinaagi sa pagtanyag kanila, sa mga bisita, sa pagkaon ug mainom. Nagpaandam dayon siya sa iyang matanyag kay sayod siya sa kalayo sa lugar ug kaninit sa ilang byahe. Ang Dios usab naghulat nga atong makita diha sa mga nanginahanglan. Siya nagpaabot sa atong pag-atiman kaniya kay siya nagdala og panalangin ug grasya sa atong kaayo sa isigkaingon.

Pagkabulahan sa tawo diin ang Manluluwas nagpasakit ug kini iyang gitubag. Kini tataw diha sa ikaduhang pagbasa diin si Jesukristo, ang Manunubos nagpasakit ug namatay alang kanato bisan kita dili takos. Ang tawo pinaagi kang San Pablo mitubag diha sa iyang pagdawat sa mga pag-antos isip kabahin sa pagpasakit ni Kristo. Kita usab gipakamatyan sa Dios. Ato na nga higayon nga mopas-an sa atong mga pag-antus usab uban sa pagsalig sa kalingkawasan. Kining maong mga pasakit masinati nato diha sa pagpabilin nga matinud-anon bisan ang uban tikasan, sa pagminaayo bisan kita gitamay, sa pagpailob bisan taliwala sa mga pagsalikway tungod sa atong pagbuhat nga minatarong.

Andam ka ba nga motubag sa iyang pagdapit? Misalig ka ba nga ikaw gitawag sa pagtubag sa iyang pagpaila matag gutlo sa imong kinabuhi?