St. Mary of the Perpetual Rosary Parish Buhangin (SMPRP) altar servers sending forth 2025 (Photo: St. Mary of the Perpetual Rosary Parish)

Sending Forth ug Renewal sa 93 ka mga Altar Servers sa SMPRP Gipahigayon

Puno sa kalipay nga gisaksihan sa mga ginikanan, parokyano ug mga lideres sa St. Mary of the Perpetual Rosary Parish Buhangin ang 93 ka altar servers nga mitindog atubangan sa altar sulod sa ilang Sending Forth ug Renewal nga gihimo atol sa 3:30 sa hapon nga Misa. Gipangulohan kini sa Kura Paroko nga si Rev. Fr. Orlando “Orly” Angelia, diin nagtimaan sa usa ka halangdong panagtigum ug nga dili lamang usa ka panapos sa ilang pagbansay, kondili usa pagpanghimatuod sa ilang tawag sa pag-alagad sa Ginoo.

Kining mga batan-ong altar servers nakatapos sa usa ka hugot nga pagbansay ug pahalipay nga gitunol sulod sa tulo ka Sabado nga gihatag ni Bro. Junifer Francis Valde, seminarian ug Pastoral In-charge isip kabahin sa ilang preparasyon. Ang unang adlaw gipahinungod sa espiritwal nga pagbansay nga usa ka oportunidad nga laloman ang ilang gugma sa Ginoo ug sa Eukaristiya. Pinaagi sa pag-ampo ug hilom nga pamalandong, sila gihangyo nga mas duol pa sa presensya ni Kristo, aron ang matag lihok sa altar magagikan sa usa ka tinud-anay nga gugma ug debosyon.

Sa ikaduhang Sabado, gisentro ang pagtudlo sa liturhiya ug doktrina. Sa wala pa magsugod ang programa, adunay rehistrasyon, opening prayer, ug mainit nga welcome remarks gikan kang Fr.Orly. Gipasabot niya sa mga altar servers nga ang ilang pag-alagad dili lamang aksyon, apan usa ka pagsabot sa balaang kahulugan sa Misa. Gipangayo nila nga masabtan sa ilang kasingkasing ang kahimtang sa ilang papel nga dili lang kini pagbuhat og buluhaton, kundili pagpakita sa ilang pagtuo ug pag-alagad sa Diyos.

Pag-abot sa ikatulong Sabado, ilang gihimo ang teknikal ug praktikal nga pagbansay. Sa maong adlaw, gitun-an nila ang tukmang paagi sa pagdala sa kandila, pagserbisyo sa altar, paggamit sa mga santos nga butang, ug paglihok sulod sa liturhiya nga walay kapakyasan. Ang tumong mao nga mag-alagad sila nga adunay kumpiyansa, kahibalo, ug respeto sa kasagradohan sa ilang gibuhat.

Pagkahuman sa pagbansay, mitungha sila sa usa ka adlaw nga recollection nga may tema nga “Ang Tinuod nga Alagad.” Sa maong adlaw, gitugotan sila nga magpamalandong sa ilang tinuod nga katuyuan sa pag-alagad. Gipukaw ang ilang mga hunahuna kabahin sa pagpainubos, sakripisyo, ug matinud-anong pagserbisyo bisan sa panahon nga wala sila mamatikdi. Gihagit sila sa pagtan-aw balik sa ilang kasingkasing ug pangutan-on ang ilang kaugalingon: Ako ba tinuod nga nagaalagad kang Kristo?

Ang Sending Forth ug Renewal dili lang usa ka seremonya apankini usa ka pagpadala sa Simbahan sa mga batan-ong ministro nga andam ug buhi ang espiritu. Sa panahon sa Misa, si Fr. Orly mipahimangno sa tanan nga ang pagserbisyo sa altar usa ka balaang tahas, ug ang mga altar servers usa ka padayong pahinumdom sa presensya sa Diyos sa matag liturhiya. Ang ilang pagbarog atubangan sa altar usa ka ilhanan nga andam na sila sa pagpadayon, puno sa panalangin ug kadasig.

Atong ipadayon ang pag-ampo para sa atong 93 ka altar servers nga unta magapadayon sila sa ilang tawag, magapabiling matinud-anon, ug magatubo pa sa ilang pag-alagad ug bokasyon ngadto kang Kristo.

No Comments

Post A Comment