Ayaw patig-aha ang imong kasing-kasing

Ika-18 na Domingo sa Ordinaryong Panahon (August 3, 2025)
Eccl 1:2; 2:21-23 / Ps 90:3-4, 5-6, 12, 13, 14, 17 / Col 3:1-5, 9-11 / Lk 12:13-21

Aduna bay katagbawan ang tawo? Unsa bay makatagbaw sa tawo? Anaa ba diha sa pagpakadato ug pagka-adunahan?

Ang unang pagbasa nagpahimangno kanato sa pagbantay sa pagsalig sa mga butang niining kalibotana. Walay makatagbaw kanato niining kalibotana gawas lamang sa Dios. Ang trabaho, ang bunga sa atong trabaho, ang ganti ug bunga tungod sa atong pagkugi ug pagtrabaho, kining tanan lumalabay lamang. Walay makatagbaw nga bisan unsang molabay lamang gawas kon masentro kini sa Dios. Mas maayo pa ipalabi nato ang pakig-uban sa Dios sa tanan natong gimbuhaton kay Dios lamang ang magpabilin kanunay.

Sa ikaduhang pagbasa, giawhag kita sa pagsentro sa atong kaugalingon sa mga butang langitnon. Dili lamang unta kita mohatag og bili kutob sa unsay makita, mabati, mahikap, magunitan nga anaa niining kalibotana. Ang atong paningkamot dili lang unta taman sa masukod, kondili ang anaa sa sulod sa atong kasing-kasing, kinaiya ug maayong pagtagad sa usa’g usa. Kay ang tanang materyal mahanaw. Ang unsay espiritwal ang magpabilin sa kahangturan. Isip sumusunod sa nabanhaw ug buhi nga Dios, maayo pa nga bansayon na nato ang pagpuyo nga espirituhanon kaysa mosalig sa mga butang ug kahilayan nga adunay limitasyon.

Sa Ebanghelyo, bisan unsa ka daw kasaligan ang kabtangan ug bahandi nga atong maangkon, nga sa tan-aw nato sarang makabuhi kanato sa taas nga panahon, dili garantiya sa matuod nga kamaya sa kasing-kasing. Kay kon kabubot-on sa Dios nga kuhaon na kita Niya, walay pulos ang tanan natong natigom ug mahagkom. Mag-unsa man ang kutob sa atong mahagkom ug maabot kon karon dayon moabot na ang atong kataposan. Mas maayo pa nga pangitaon nato ang kamaya diha sa pagpaambit sa unsay anaa kanato. Walay mawala kanato kon andam kita nga mopaambit. Mas madugangan pa hinuon kini sa Tag-iya nga naghatag niini kanato. Kini nga kamaya ang dili mawala, ni kabayran sa bisan unsa niining kalibotana.

Buot ka ba nga madato ug maadunahan atubangan sa Dios ug sa tawo? Pamatia ang tawag sa Ginoo ug gaksa Siya nga maoy Tag-iya sa tanan. Kon karon makadungog ka sa iyang tingog, ayaw patig-aha ang imong kasing-kasing.