63rd Pista sa Pagtuo: Panaghiusa sa Panaw sa Paglaum

Gisaulog sa Parokya ni St. James the Apostle sa Bunawan ang ilang ika-63 nga Parokyal nga Fiesta niadtong Hulyo 25, 2025, uban ang dakong kalampusan ug kalipay nga nagpakita sa pagtuo, tradisyon, ug panaghiusa sa komunidad. Gipangulohan ang Misa ni Most Rev. Romulo G. Valles, D.D., kinsa misangyaw sa mensahe nga nagpadasig sa tanang parokyano. Adunay tulo ka punto ang gihatagan og duso ni Archbishop Muloy sa iyang homilya.

Ang unang punto sa iyang mensahe mao nga ang patron nga si San Santiago nahimong duol kang Hesus. Maong ang mensahe alang sa tanan kay magmaisog ug magmalig-on tungod sa iyang pangaliya. “Hinaot tabangan kita ni Señor Santiago nga mahimong mga magsimba, mapainampuon, ug balaan.”

Ang ikaduhang punto kay to follow Christ we bear the mark of the death of Christ. Busa pas-anon ang krus sa atong kinabuhi.

Ang ikatulong punto kay ug kung kinsa ang gusto mualagad sa Ginoo, should become a slave. Giawhag niya ang tanang paorkyano na magpakasakripisyo kita alang sa parokya uban ni Fr. Edsel, kay ang atong ganti anaa sa langit.

Sa katapusan sa homiliya, gi-awhag usab niya nga magpadayon sa ilang panaw isip mga Peregrino sa Paglaum subay sa Jubilee 2025. Ang tibuok selebrasyon gisuportahan ug gipalig-on sa espiritwal nga giya ni Rev. Fr. Edsel J. Paloma, kura-paroko, nga misilbing lig-on nga pundasyon sa preparasyon ug pagdumala sa mga kalihokan.

Niadtong makasaysayang adlaw sa pista, opisyal nga gi-instalar isip bag-ong kura paroko sa Parokya ni St. James the Apostle si Rev. Fr. Edsel J. Paloma, nga motabang ug motiman sa espiritwal nga panginahanglanon sa parokya sulod sa unom ka tuig. Ang iyang pagtudlo isip steward o tinugyanan sa panaw sa pagtuo sa katawhan nagtimaan sa bag-ong yugto sa kinabuhi sa parokya—puno sa paglaum, panaghiusa, ug pag-alagad. Gidawat siya sa mainiton nga pagsuporta sa mga lider sa parokya, TDM Sisters, mga GKK, ug tanang katawhan, uban ang panalangin nga iyang pagpangalagad mahimong puno sa grasya, kalig-on, ug paggiya nga may kalipay ug kasingkasing.

Dako usab ang papel nga gibuhat sa Service Committee nga gipangulohan ni Roy Sarile. Ilang gi-organisa ang dagkong aspeto sa pista, gikan sa logistics, seguridad, pagkaon, ug koordinasyon sa mga aktibidad nga nakatabang aron ang tibuok adlaw nga selebrasyon molungtad nga malinawon ug hapsay. Ang dedikasyon sa komite maoy nagtugot nga ang espiritu sa pagtinabangay ug pag-alagad makita sa matag sulok sa parokya. Dako sab ang kontribusyon sa mga TDM Sisters, nga dili lamang mga administrador sa Holy Cross of Bunawan, kondili kabahin usab sa pagsangyaw sa maayong balita ngadto sa kaatwhan ug sa ilang suporta, gikan sa misa hangtod sa kasadya human sa maong misa.

Pagkahuman sa misa, gisugdan ang Fiesta sa Nayon, diin ang matag zona mipakita sa ilang panaghiusa pinaagi sa pagpaambit og pagkaon ug panag-uban. Sa laing bahin, daghang GSLs ang napahimulos sa dakong raffle draw diin daghang premyo ang gipangdaug. Sa gabii, banda ang mitugtog ug misira sa pista uban sa musika, sayaw, ug kalingawan. Ang mga dula, sayaw, ug kanta mipuno sa kahayag sa hapon, nga misimbolo sa kalipay sa usa ka komunidad nga naglakaw uban sa paglaum. Gisundan kini sa exhibition basketball game tali sa Holy Cross of Bunawan ug SJAP Team, ug dayon sa dula batok sa Kaputian basketball team.

Ang ika-63 nga Parokyal nga Fiesta dili lang usa ka selebrasyon sa parokya, kondili usa ka buhi nga pagpanghimatuud sa gahum sa pagtuo, panaghiusa, ug paglaum — uban kang Señor Santiago, uban sa katawhang simbahanon nga nagpadayon sa ilang panaw isip mga Peregrino sa Paglaum. (An-Jean Naraga-Moneba)