“Kabahin gihapon kini sa plano ug kabubot-on sa Ginoo.” – Fr. Francis

Alas siete pa lamang sa buntag, Agosto 4, Lunes, nakaparking ug andam na ang ambulansya sa San Pedro Cathedral. Miabot si Rev. Francis Flores pasado alas otso sa buntag uban kang Fr. Junar Dela Victoria, Kura Paroko sa Ascension of the Lord Parish, nga maoy nagmaneho sa iyang gisakyan. Uban usab sa maong sakay gikan sa ospital si Dra. Marilyn Lim nga nag-atiman kaniya.

Unang gitakda ang ordinasyon sa pagkapari ni Rev. Flores didto sa Holy Family Parish sa Baliok, ang iyang gigikanan nga Parokya. Apan tulo ka adlaw sa dili pa siya ordinahan nadala siya sa ospital nga maoy hinungdan sa kausaban sa lugar. Bisan ang pipila ka mga lihok sulod sa rito, sama sa dugay nga pagluhod ug pagtindog, nausab. Nag-igmat usab ang mga nagsilbi sa liturhiya sa dagan sa ordinasyon.

“Gitugot gihapon niya bisan sa unexpected nga panghitabo, na ICU,” matod pa ni Fr. Francis sa iyang mga pulong-pasalamat human sa iyang ordinasyon. Dakong kalipay ang gipadayag ni Fr. Francis nga nahinayon ang iyang ordinasyon pinaagi sa pagtapion sa mga kamot ni Arsobispo sa Davao, Most Rev. Romulo. G. Valles, D.D., “Thanks be to God kay gitugot gihapon niya kining dako nga kasaulogan sa Simbahan, ang ordinasyon sa pagkapari.”

Taliwala sa mga kalit nga kausaban, gidawat ni Fr. Francis nga kini kabahin sa plano sa Dios. “Aduna may mga kausaban apan nasayod ako nga kabahin gihapon kini sa plano ug kabubot-on sa Ginoo. Nasayod ako nga kining akong nasinati karon kabahin gihapon sa akong pagtubag sa maong tawag.”

Gibalik-lantaw ni Fr. Francis ang pagsugod sa iyang bokasyon diha sa San Pedro Cathedral. “And this is really the Lord’s plan nga ma ordain ko diri mismo sa Cathedral, kay history sa akong vocation, ang akong mama, diri nagsugod, iya ming gidala diri ang tibuok pamilya kada kaadlawon, diri mi manimba,” padayag ni Fr. Francis.

Sa iyang kalipay, nagpasalamat siya ilabina sa Ginoo nga nagtawag kaniya. Iya usab nga gipasalamatan ang Arsobispo sa pag-ingon, “Salamat sa imong willingness to ordain me as your priest in the Archdiocese of Davao bisan sa health condition nga akong giatubang karon.”

Human pagsuot niya sa bisti sa pagkapari, makatandog balahibo ang panan-awon sa dihang migakos si Fr. Francis sa iyang mga igsoon. Daw kumuton ang kasing-kasing sa makadungog sa iyang pag-ingon, “Salamat usab sa akong pamilya. Ya, Te, salamat kaayo sa pag-atiman nako, sa pag-uban sa akoa bisan naglisod nakog ginhawa, salamat kaayo sa pag-atiman ug suporta kanako kanunay. Salamat sa inyong mga pag-ampo nga madayon kining ordinasyon bisan wala na si mama ug papa, nasayod ako nga nalipay sila karon nga nagtan-aw kanako.”

Gipasalamatan niya ang tanang pari ug layko nga nahilambigit sa iyang pormasyon sa panaw sa pagkapari. Iyang gibatbat, “Ako usab nga pasalamatan ang mga pamilya, mga GKK’s kon diin ako nag exposure. Si Datu Anog ug ang iyang pamilya nga anaa diri, ang ilang chieftain sa tribo sa Bagobo Clata, salamat kaayo Ama, Ina.”

Gisabot ni Fr. Francis nga gasa kini dili lamang alang kaniya ug sa iyang pamilya ang iyang pagkapari, kondili alang sa tibuok Simbahan. Siya nagaampo, “Sayod ka Ginoo nga ako nahigugma kanimo. Ug gusto nga ihatag nako ang akong kasing-kasing Kaniya aron adunay gugma sa pagpakaon ug pag-atiman sa iyang mga karnero.”