Paghiusa ug Pagpangalagad: Ika-74 Kapistahan ug Instalasyon sa mga bag-ong kaparian sa the Most Sacred Heart of Jesus Parish-Calinan

Napuno sa kalipay ug pagtoo ang katawhan sa The Most Sacred Heart of Jesus Parish – Calinan sa pagtimaan sa ika-74th Kapistahan sa parokya nga adunay tema na “Pagsunod sa Tunob sa Paglaum ug Gugma; usa ka Panaw Paingon sa Sagradong Kasing-kasing ni Hesus”. Apil sa maong espesyal nga selebrasyon ang instalasyon sa bag-ong kura paroko, si Rev. Fr. Pepe D. Retorca, ug ang presentasyon iyang mga kauban nga mga Parochial Vicars nga sila Rev. Fr. Raul L. Nieves ug Rev. Fr. Calexto C. Peligrino Jr.

Ang Santos nga Misa ug seremonya sa instalasyon gipangulohan ni Most Rev. Romulo G. Valles, D.D., Arsobispo sa Davao, nga may mapaubsanong mensahe sa pagdawat ug pagpakabana sa espiritwal nga kinabuhi sa parokya.

Niadtong adlawa, napuno sa pagsalig ug pag-ampo ang simbahan sa presensya sa nagkadaiyang mga miembro sa parokya, lakip na ang mga manimba ug deboto, mga GKK Leaders, Mga miyembro sa Parish Pastoral Council ug ang Parish Staff nga masinati ang bagong yugto sa ilang panaw sa pagtuo uban sa bag-ong administration.

Sa iyang homiliya, gihagit ni Archbishop Valles ang bililhon nga papel sa kaparian sa pagdumala dili lamang sa mga seremonyas sa simbahan, kondili sa pagpangalagad sa katawhan isip tinuod nga mga alagad ni Kristo. Gidani usab niya ang suporta sa mga laiko aron mapadayon ang kinabuhi sa parokya nga puno sa gugma, panaghiusa, ug pag-alagad.

Human sa misa, usa ka salo-salo ang gihimo sa parish auditorium diin nagpakita og mainitong suporta ang mga membro sa komunidad ngadto sa ilang bag-ong kura paroko ug mga kaparian.

Ang ika-74th kapistahan ug installation sa mga bag-ong pari dili lamang usa ka panagtigom, kondili usa ka pagpangandam sa mas lawom nga pag-alagad sa Ginoo, uban sa panibag-ong kusog ug paglaum alang sa umaabot.

Viva Sagrada Corazon de Jesus! Malipayong Fiesta sa tanan!

(By Vicente R. Separa Jr.)