“Bulahan ang Lungsod nga Gipili sa Ginoo”

Atol sa ikatulong misa sa Our Lady of the Miraculous Medal Parish, gipahigayon ang pormal nga presentasyon sa bag-ong pari nga si Rev. Msgr. Maximo Sarno isip Parish Priest ug ang Appointment usab sa bag-ong Parochial Vicar nga si Rev. Fr. Boy Roland Ong.

Ang maong seremonya gipangulohan mismo sa Arsobispo sa Davao, Most Rev. Romulo G. Valles, D.D., samtang ang opisyal nga pagpresenta gibasa sa Chancellor nga si Rev. Msgr. Jimmy Gamboa. Si Msgr. Sarno magsilbi isip Parish Priest gikan Hunyo 1, 2025 hangtod sa tuig 2031.

Sa homiliya, gi-highlight ang Salmo: “Bulahan ang lungsod nga gipili sa Ginoo alang sa iyang kaugalingon.” Ang “bulahan” nagpasabot sa kalipay ug panalangin nga gikan sa Dios, ug ang “lungsod” nagpasabot sa katawhan nga gipili sa Iyang gugma ug saad.

Kita isip parokya gitawag nga magpuyo sa pagkahiusa, mag-alagad, ug magpakita sa gugma sa Dios, ilabi na sa pagdawat sa atong bag-ong mga magbalantay sa pagtuo.

Dakong kalipay ang gibati sa mga parokyano samtang mainiton nga gidawat ang panaw sa paggiya sa Ginoo pinaagi sa atong mga bag-ong pari. (Marilou Luzon | OLMMP SoCCom)