Mga Bag-ong Magbalantay sa Parokya

Agosto 3, 2025 — St. John Marie Vianey Sunday o mas nailhan nga Priest Day! Sa maong adlaw gi-install isip bag-ong Kura Paroko sa San Pablo Parish si Rev. Fr. Dioscoro R. Saniel, nga mao ang ika-12 nga Kura Paroko sa parokya.

Si Fr. Saniel dili na bag-o sa San Pablo Parish. Kaniadto, nagsilbi siya isip Parochial Vicar sulod sa walo ka bulan diin human niini, nabalhin siya sa St. John the Baptist Parish sa Lasang isip Parochial Vicar ug gitudlo usab nga Priest-in-Charge sa pagatukorong parokya nga karon nailhan nga Christ the King Parish sa Brgy. Kauswagan. Siya ang nahimong pinaka-unang Kura Paroko sa maong parokya.

Dugang pa, si Fr. Saniel nagsilbi usab isip Procurator ug Formator sa St. Francis Xavier College Seminary.

Gipanguluhan mismo ni Archbishop Romulo G. Valles ang kasaulogan, nga gisaksihan sa parish staff ug volunteers, Parish Pastoral Council, parishioners, ug pipila ka mga GKK Servant Leaders nga nagrepresentar sa 59 ka GKK sa parokya. Sa pormal nga pagpresenta kaniya sa katawhan, si Rev. Msgr. Jaime J. Gamboa, Chancellor sa Archdiocese of Davao, mibasa sa sulat sa Arsobispo nga nagtudlo kang Fr. Saniel nga mamahimong Kura Paroko sa San Pablo Parish.

Sa samang higayon, gibasa ug gi-presentar usab sa katawhan ang sulat sa Arsobispo nga nagtudlo kang Rev. Msgr. Julius C. Rodulfa ug Rev. Fr. Ramon C. Jamora Jr. isip Parochial Vicars, ug kang Rev. Fr. Ritsche J. Gamaya isip Resident Priest sa parokya.

Mainiton ug malipayong gidawat sa katawhan sa San Pablo Parish ang mga bag-ong kaparian nga magpadayon sa pag-atiman sa Simbahan sa Dios, ilabi na sa tibuok ginsakupan sa parokya. Si Fr. Saniel mao usab ang Vicar Forane sa San Pablo Vicariate.

Usa sa mga nakigduyog sa okasyon mao ang kanhi Kura Paroko ug klasmeyt sa seminaryo ni Fr. Saniel —si Rev. Fr. Allan T. Rodriguez.

Sa kinatibuk-an, mapasalamaton ang Arsobispo sa mainiton nga pagdawat sa mga kaparian sa ilang bag-ong mga katungdanan, ug mapasalamaton usab ang mga kaparian sa pagsalig nga gihatag kanila, ilabi na kang Fr. Saniel. Dakong kalipay ang ilang gibati sa mga parokyano sa Simbahan alang sa mga magbalantay nga gitugyan sa San Pablo Parish. (Brian Origenes | San Pablo Parish SoCCom)