San Roque, Modelo sa Pag-alagad ug Pagtuo

Malipayong gisaulog sa GKK Sr. San Roque sa Daliao, Toril ang ilang 62nd Patronal Fiesta kaniadtong Agosto 16, 2025 sa alas-8 sa buntag, pinaagi sa usa ka Santos nga Misa nga gipangulohan ni Rev. Fr. Jesus Samaniego, Kura Paroko sa Sto. Rosario Parish, Toril.

Sa iyang homiliya, gipasabot ni Fr. Samaniego ang kinabuhi ni San Roque, usa ka layko nga mitabang ug mi-alagad sa mga masakiton. Iyang gipahinumdoman ang mga sakop sa GKK sa duha ka hinungdan nganong adunay patron nga ginasaligan ang matag kapilya: Una, aron mahimong modelo sa kinabuhi nga inspirasyon nga pwede gihapon ta nga mamahimong santos. Ikaduha, tungod kay gituohan nato nga sila maayong intercessors ug tigpaabot sa atong mga pag-ampo ngadto sa Dios.

Sa bahin sa pasalamat, gipahayag ni Elmer Palatulan nga Pangulo sa Katilingban ang iyang kalipay ug pagpasalamat sa Dios ug sa Espiritu Santo nga padayon nga nagahatag inspirasyon sa komunidad, ilabi na nga nakaabot na sa 62 ka tuig sukad pa sa 1963 nga katukuran sa ilang GKK.

Usa sa mga labing talagsaon nga bahin sa fiesta mao ang programa nga “Tsinelas para sa Kabataan” nga gipangulohan ni Elizabeth Lomarda Martin Malnegro,usa ka sponsor gikan sa America. Ang mga tsinelas nga gihatag sa mga kabataan naghatag ug dakong kalipay ug nakapahimo nga espesyal ang pagsaulog karong tuiga.

Human sa Misa, libre nga gipang-apud-apud nga pagkaon kon packed lunch sa mga mitambong nga gihatag ni Mr. Arturo ug Mrs. Eva Corcino,, tag-iya sa EC King Catering Services, isip pagpasalamat ug pagpahigayon sa panaghiusa.

Ang 62nd Patronal Fiesta sa GKK Sr. San Roque nagpakita dili lamang sa pagpasidungog sa ilang patron, kondili usab sa buhi nga pamatuod sa pagtuo, pagpakig-ambit ug paghiusa nga nagpadayon sulod sa kapin unom ka dekada. (Allyza Hope Tabigue)