Nagkahiusang Panaw sa mga Malaumon Uban sa Pangama ni San Roque

Sa dakong kalipay ug dakong pagpasalamat sa Ginoo nasinati sa Parokya ni Sr. San Roque ang ilang ika-41 nga kapistahan niadtong Agosto 16, 2025 uban sa Tema “San Roque Sumbanan sa Paglaum sa nagkahiusang panaw sa kinabuhi sa mga matuohon” nga gisugdan pinaagi sa usa ka Santos nga Misa sa alas nuwebe sa Buntag nga gipangulohan sa halangdong Arsobispo sa Davao, Most Rev. Romulo G. Valles, D.D., nga naghatag og lawom nga pagtulon-an kabahin sa “Upat ka Putahe sa Pag-alagad” atol sa iyang homiliya inubanan ang aspeto sa Pagtoo nga Katoliko, ug Kaambitan sa Pagtoo.

Pagkahuman sa Pontifical Mass gisunod dayon ang Sakramento sa Kompirma alang sa kapin 80 ka mga candidates for confirmation diin kadaghanan kanila gikan sa laing mga tinuohan nga mipili nga modawat sa Katolikong Pagtuo. Kini usa ka dakong kalampusan alang sa Misyon sa Parokya nga magdala og mas daghang katawhan ngadto sa Ginoo.

Sa likod sa Simbahan nagpadayon ang kalipay pinaagi sa lain-laing mga kalihukan nga gipasiugdahan sa mga PSKB ug uban pang mga GSL. Ang DXGN Team mipasiugda ug mga dula samtang ang mga Cursillista mao ang nangulo sa mga Parlor Games nga gisalmotan sa mga bata, kabatan-onan ug mga hamtong. Usa sa giatangan nga bahin mao ang Purok Display Contest nga ang Tema “Pista sa Bukid” nga gidumala ni Ma’am Joy Madijanon, ang kahayag sa kultura ug Tradisyon sa Malabog.

Dili pud makalimtan ang mga raffle draw diin nabunot ang mga mananaog sa 3 ka sakop nga Bugas, mao sila Flora Regidor gikan sa Sona 11, Mrs. Buagas Taga Sona 7, ug Divina Guilaran gikan sa Sona 9. Nahatagan ug nakadawat usab ang mga partisipante og mga gamit sama sa mga Balde,Kabo , pitsel ug uban pa isip pahalipay ug pasalamat sa ilang aktibong pag – apil ug pakigduyog sa kapistahan.

Atol sa Paniudto gipanalanginan ni Bro. Aldong usa ka PSL ang mga Pagkaon, nagdungan sa pagpangaon ang mga katawhan sulod ug gawas sa ilang Purok diin, halos ang tanang Sona adunay lechon nga giandam ug mga linutoang lokal, samtang ang mga bisita nisuroy sa namili sa mga display sa matag purok. Usa kini ka pagmatood sa pagkahiusa ug pagbati sa pamilya sa tibook Parokya.

Ang tibook programa gi-organisar sa mga PSKB uban sa ilang masaligon nga Parish Coordinator Mr. & Mrs. Elmo & Faith Sevilla, kauban usab ang komitiba sa Secretariat, mga SoCCom ug PSA nga gipangulohan nila Ma’am Marycris Deguiñon PSA Parish Coordinator ug Arlene Tarnate Parish Soccom Coordinator uban sa pagtugot sa Kura Paroko Rev. Fr. Amado Arroyo.

Ang kasulogan nagtapos nga ang mga tawo nanguli nga malipayon, puno sa Espiritu Santo sa Pagtoo, ug nagdala sa Paglaum nga nagpadayon pa ang Pagkahiusa ug Pag-alagad sa Parokya ni Sr. San Roque sa sunod pang mga katuigan.

VIVA SR. SAN ROQUE!

Padayon sa Pagpangalagad!

(By Arlene R. Tarnate | SRP SoCCom)