Kung dako ka, kinahanglang magpaubos ka

Ika-22 na Domingo sa Ordinaryong Panahon (August 31, 2025)
Sir 3:17-18, 20, 28-29 / Ps 68:4-5, 6-7, 10-11 / Heb 12:18-19, 22-24 / Lk 14:1, 7-14

Unsa ba ang matuod nga pagpaubos? Kanus-a man kita makapuyo sa pagpaubos? Unsa may atong mapaabot sa pagpuyo nga mapaubsanon?

Ang pagpaubos walay magpasabot sa dili paglihok bisan aduna kay matampo. Nagpasabot hinuon kini nga moboluntaryo ka sa kaugalingon aron pagpalambo sa katilingban. Mao man kini ang nahisgutan sa Ebanghelyo. Angayan lamang kita nga molingkod sa angay kanato. Dili kita angayan nga magpaimportansiya. Kita na mismo ang nasayod sa atong kapasidad ug papel alang sa kaayohan sa uban. Ikaw, andam ka ba nga mihimo og aksiyon aron mapahiluna ang tanan ilabina sa nagkagubot nga katilingban? Andam ka ba nga mobuhi sa imong pwesto aron makabaton og kahapsay ang tanan?

Ang pagpaubos wala magpasabot nga paghilom na lang motingog taliwala sa mga sayop. Nagpasabot hinuon kini sa pagbansay sa kahibalo sa paaging puno sa pagrespeto aron pagtul-id sa hiwi nga mga plano ug kahimtang sa katilingban. Mao kini ang atong nadungog sa ikaduhang pagbasa. Ang Ginoo nga mapaubsanong naghusga ug naghukom maoy atong giduolan. Ang iyang hukom nga makapahiusa sa tanan maoy atong gitamod, ug dili ang atong panabot lamang. Makapaubos ka ba pinaagi sa paghukom sa palibot aron makapahiusa sa nagkatibulaag nato nga kahimtang?

Ang pagpaubos wala magpasabot sa pag-uyon ug pagsunod-sunod na lamang sa kanunay. Nagpasabot hinuon kini sa pag-abli kanunay alang sa pagkat-on ug pagtampo sa unsay naangkon, materyal man o talento. Mao kini ang gisaysay sa unang pagbasa. Ang mas dako nga naabot, kinahanglang mas magpaubos. Andam siya nga maminaw ug mokat-on. Makapalipay siya sa uban. Mahimo ba nimo nga mamati ug mokat-on alang sa pagbinayloan sa kahibalo ug kakayahan alang sa kalamboan sa kadaghanan?

Ang matuod nga pagpaubos mao ang pagsalamin sa kaayo sa Ginoo. Mapuy-an nato kini kung makatabang kita sa lihok sa kaluwasan alang sa tanan. Maangkon nato ang kamaya nga walay tupong uban kaniya. Matod pa sa Salmo, sa kaayo sa Ginoo gibuhatan Niya og paluy-anan ang kabos.