“Pista Ni Sr. San Roque: Timaan sa Paglaum ug Panaghiusa Sa Cogon, Sirawan”

Sa pagsugod pa lang sa preparasyon, giablihan ang selebrasyon pinaagi sa siyam ka adlaw nga novena. Kada gabii, ang mga deboto mitambong sa kapilya aron mag-ampo ug magpasalamat kang Sr. San Roque. Ang novena nahimong pagpangandam sa espiritu ug sa tagsa-tagsa alang sa adlaw sa pista.

Bisan pa sa espirituwal nga aspeto gisaulog usab namo ang Family Night diin nagtapok ang mga pamilya aron manan-aw sa mga pasundayag sa mga Kabataan. Gipahigayon usab namo ang Coronation Night sa Ginoo at Ginang Cogon 2025. Kini nga kalihokan usa ka paagi sa pagpasidungog sa mga magtiayon nga bisan pa man sa kadugay na sa ilang panag-uban nagpabilin gihapon sila isip magtiayon. Sa kalipay, kasakit, kapit-os ug sa kahamugaway sa kinabuhi, anaa sila nagpabilin nga nibarog sa ilang mga gipanumpaan.

Pagkahuman sa siyam ka adlaw nga Novena gisundan kini sa usa ka prusisyon diin giprusisyon ang imahe ni Sr. San Roque. Daghang deboto ang misalmot, nagdala ug kandila ug nagrosaryo, nagpakita sa ilang dakong pagtuo ug pagsalig sa panalipod sa maong patron.

Sa mismong adlaw sa kapistahan gipasiugdahan ang balaan nga misa nga gipanguluhan ni Fr. Soren Abellanosa, Parochial Vicar sa Sto. Rosario Parish, Toril. Ang misa gitambongan sa daghang katawhan nga sakop sa Cogon, Sirawan ug sa ubang kasilinganang dapit. Ang maong misa gi-live coverage kini sa DXGN FM, aron makita og mapaminawan sa mga deboto nga wala kasimba ug naa sa layong dapit. Ang mensahe sa pari nagtumong sa pagtuo, paglaum, ug panaghiusa sa komunidad.

Ang kapistahan ni Sr. San Roque dili lamang usa ka tradisyon kondili usa ka dakong selebrasyon sa pagtuo, panaghiusa sa Cogon, Sirawan. Pinaagi sa tabang sa simbahan ug suporta sa mga lumulupyo nahimong malinawon ug malipayong kalampusan ang kapistahan karong tuiga. (Charlotte Asilum, GKK Soccom)